Sipai leh bomb puak karah Ukraine football!
Russia leh Ukraine indonain zia lam a la pan thei lo a, nunphung a la pangngai thei lo - mahse, heti chung hian Ukrainian football season ṭan a ni leh ta a, Ukrainian Premier League match hmasa berah Shakhtar Donetsk leh Metalist Kharkiv chu 0-0 in an inhnehtawk.
Ruahman dan chuan league hi Ukraine khawpui Kyiv leh a chhehvel hnaihah khelh phawt tur a ni. Indona kara inelna kalpui an ni a, fimkhur a la ngai reng - fans pawh stadium-ah an awm a la rem lo.
UPL-ah hian team 16-in inelna an hmachhawn a, nimin pawh khan match khat chu khelh a ni - he thu buatsaih a nih thleng hian league-in harsatna a la tawk rih lo a, kalpui thei zel tak ang maw, tih chu zawhna awm a ni.
Mittui nen
UPL hi Thawhlehni khan khelh ṭan a ni a, Ukraine president Volodymyr Zelensky chu league khelh ṭan a nih leh theih nana thawm nei ber pawl a ni a, UPL khelh chu Ukraine mipuite tlawm lohzia lantirnaah a ngai.
February 24 khan Russia chuan Ukraine hi a run ṭan a, UPL pawh tihtawp a ni - thla ruk zet an chawlh hnuah an lo kir leh ta a, khelmualah player-te chu match official-te nen an rawn lut a, Ukraine flag nena inthuamin, an mittui dan zawh rual a ni lo.
Ukrainian sipaite chuan inkhel hi an vil reng a, inkhelh laia beih an tawh palh thuta player-te hmun him lama hruai turin an inpeih at reng - nunna thapin football an khel a ni ber!
Mittui kara hlimna
Shakhtar captain Taras Stepanenko chuan, "Minute 90 chhung chu engmah ngaihtuah loin football chiah ka rilruah a awm. Hlimnain min tuam a, nuam ka ti takzet a ni. League atana kan inpuahchah aṭang khan he hun hi ka nghak ṭang ṭang a, ka rilru pawh a zam ve hle.
"Mahse, kan hnam hla ka ngaihthlak a, ka ṭhiante leh kan khingpui turte ka hmuh khan kan ram hi ka chhuang em em a, kan ram leh mipuite tana a hlut em avangin league kan ṭan leh thei ta hi ka hlim hle a ni," a ti.
Stepanenko chuan sawi zawmin, "Thla ruk chhung chu indona kan hmachhawn ta a, engtikah nge a tawp dawn kan hre lo. Naktukah a tawp mai thei a, kum khat kan nghah a la ngai mai thei bawk. Mahse, ni tinin kan ram leh mipuiten he indonaa hnehna kan chan theih nan leh kan chhungte an lo haw leh theih nan ka ṭawngṭai ṭhin - hei hi ka duhthusam chu a ni a, chumi tan chuan ni tin ka ṭawngṭai ṭhin," a ti a, zalen taka nun hman leh a duh.
An kim lo
Season hmasaa UPL khel zingah Desna Chernihiv leh Mariupol FC te chuan tun season-ah league an khel ve thei lo - club pahnih innghahna khawpui chu indonain a den nat zinga a tel vang a ni.
Desna Chernihiv hi Belarus leh Ukraine inrina Chernihiv khawpuia innghat an ni a, he khawpui hian kar ruk zet beih an tawh avangin inkhel zui thei an ni lo a, Mariupol FC innghahna khawpui Mariupol chu Russia-in an la tawh bawk.
UPL hian Desna leh Mariupol dinhmun an hrethiam a, club pahnih hian season tharah league khelh an duh ve leh a nih chuan UPL team 16 chu 18-ah tihpun tur a ni ang.
Ram tan
UPL match hmasa ber hi Ukraine president Zelensky pawhin a hmunah a en a, thuchah a sawi bawk. Thil mak danglam ve tak chu, ram pawn player tam takin Ukraine an chhuahsan laiin ṭhenkhat chu an chhuak duh lo.
Ajax striker hlui, Burkina Faso international Lassina Traore chu Shakhtar-ah a la châm a, Brazilian defender Lucas Taylor phei chuan Greece club POAK aṭangin Shakhtar chu Thawhṭanni khan loan-in a zawm!
Shakhtar football director leh Croatia right-back hlui Darijo Srna chuan, "Ukrainian mipuite hian hlim an phu - misual an ni lo a, midang itsik chi pawh an ni lo a, an ta ni lo chu an duh lo. Anmahni tan, an ram leh an fate tan indona an hmachhawn mai a ni," tiin a sawi.