McLaren chhuahsan tur Daniel Ricciardo

Formula 1 team McLaren chuan tun season tawp rualin Australian driver Daniel Ricciardo nen an inṭhen tur thu an sawi a, driver Ricciardo pawh hian a chhuah tur thu instagram lamah a tarlang tawh bawk.

McLaren chuan thuchhuah siamin, "McLaren Racing leh Daniel Ricciardo chuan inremna kan nei, kan inrem dan chuan 2022 season zawh hunah Daniel hi a chhuak ang," an ti. Ricciardo chuan a chhuah tur chhan chu an ruahmanna neihte a hlawhtlin theih loh vang a nih thu a sawi thung.

Kum 33 mi Ricciardo hian season tharah eng team nge a zawm dawn tih a la sawi chiang lo thung. Australian driver chuan, "Ka hma hun tur ka ngaihtuah mek, uluk taka thutlukna siam a ngai dawn. Eng nge lo thleng chu kan hre har lo ang," a ti.

F1 season kal laiah Ricciardo hian point 19 chauh a la hmu, a teammate Lando Norris chuan driver championhsip-ah point 76 a hmu tawh thung a, tawnhriat nei ṭha leh thleng sang tura ngaih zawkin beisei a phak lo.

Car intlansiakna sang ber hi nipui chawlh an hmang zo a, tun kar tawpah an tlan ṭan leh tawh dawn. August 28, Pathianni hian Belgian Grand Prix an tlan ang.