Russia-ah intlansiak a awm lo ang - F1 CEO

Indo vangin Russia an buai a, infiamna kawng hrang hrangah hrek an ni. Tun season bakah hun lo la awm tur atan Russia rama intlansiak neih tumna a awm rih lo niin Formula 1 CEO Stefano Domenicali chuan a sawi.

F1 intlansiak zingah Russian Grand Prix hi ngaihhlut hlawh zinga mi a ni a, kum 2023 aṭang chuan Igora Drive, St. Petersburg-ah tlan tura tih a ni - ruahman dan hmasaah chuan kumin hian Sochi-ah an tlan leh phawt ang.

Mahse, Russia leh Ukraine buaina a fel thei lo, infiamna hrang hrang nei leh tawh mah se ram dang mi chuan an la luhchilh lem lo. A khat tawkin silai a la puak reng a, ram pahnih hmalakna a la tawp lo.

Domenicali chuan, "Ka sawi fo tawh angin thil theih loh a awm lo, a theih dan kawng chu a awm ve leh mai ṭhin. Mahse, tun dinhmunah chuan Russian Grand Prix neih tumna leh ruahmanna a awm lo," tiin a sawi.

Russian GP promoter ANO Rosgonki lama an hotupa Alexey Titov chuan F1 hnen aṭanga an pawisa ba hmuh a duh thu a lo sawi ve thung. Titov chuan, "Intlansiak neihna turin pawisa kan pe lawk a, kan laka pawisa ba an neih kha a la awm reng, min pek let kan beisei," tiin a sawi ve thung.

Kum 2014 hnu lamah kumin hian a vawi khat nan Sochi-ah intlansiak a awm dawn lo tihna a ni, 2014 aṭanga hnehna chang ngar ngartu Mercedes tan chuan an hmun ṭha leh bial him pakhat chu an lak kiansak tihna a ni.