Premier League club an chak

Carabao Cup second round khelh zawh a ni a, Nilaini zana Premier League club inlan Leeds United, Newcastle United leh Brighton & Hove Albion ten an khingpui ṭheuh hnehin third round an inpetkai.

Premier League season bul ṭan ṭha tak, Chelsea laka 3-0 a chak hlim Leeds-in League Cup lamah pawh hnehna an chang a, an mikhual Barnsley chu 3-1 in an hneh.

Leeds tan Luis Sinisterra-a'n goal hmahruai a khung hnuah Mateusz Klich chuan penalty hmangin a belhchhah a, mahse, Leeds-in hlauthawng loin hnehna an chang bik lo.

Mads Andersen chuan si phurh a rawn sut ṭhen a, an phur vanglai takin Callum Styles chuan penalty a hlah thung - League One club-in penalty hlah an tuar zui a, Klich chuan goal dang rawn khung lehin Leeds an chak.

Newcastle United fan-te phurna belhchhahin a awm zel a, League Two club Tranmere Rovers chu 2-1 in an hneh - rin loh takin mualneitu Tranmere tan Elliott Nevitt chuan goal hmahruai a rawn khung!

Mahse, Magpies-in captain Jamaal Lascelles leh Chris Wood hmanga chhangletin hnehna an chang a, Real Sociedad forward Alexander Isak an lakluh dawn bawk avangin Magpies 'puja' a fuh chho hle.

Brighton & Hove Albion-in an mikhualna ramah Forest Green Rovers chu 3-0 in an sawp a, Brighton tana bul a ṭan hmasak berah forward thar Deniz Undav chuan goal hmahruai a khung a, Steven Alzate leh Evan Ferguson ten goal khat ve ve an khung bawk.

League Cup Second Round Results
August 24, Ningani Zan
Leeds United 3 - 1 Barnsley
Tranmere Rovers 1 - 2 Newcastle United
Wycombe Wanderers 1 - 3 Bristol City
Forest Green Rovers 0 - 3 Brighton & Hove Albion