Champion inchuhna a hautak dawn - Sarri

Lazio manager Maurizio Sarri chuan Serei A champion an tum ngam tih a sawi a, season hmasa aiin kuminah Italian champion nih tuma inum boruak a san tur thu a sawi - inelna hautak hmachhawn turin an inbuatsaih tih a sawi bawk.

Serie A match hnih ṭheuh an khel tawh - Napoli, Inter Milan leh AS Roma ten point ruk an hmu thei. Team dang parukin point li an hmu thung a, an zingah hian Lazio pawh an tel, a bul ṭan fuh zinga chhiar tel theih an ni ang.

Sarri chuan, "AC Milan hian season hmasa lama an boruak ang kha an neih leh chuan champion nawn thei tur an ni. Inter Milan hi Scudetto chuh turin an ṭha reng bawk a, season hmasa tawp lam an hman dan chhut chuan Juve pawh sawi bo theih an ni lo.

"Roma-in an mamawh ang player an la khawm thei a, chuvangin team dang hnuaia awm an tum lo ang. Keini pawhin theihtawp kan chhuah dawn a, pakhatna nih tumin kan bei dawn, season dang zawng aiin champion tuma inum boruak a ngaihnawm ka ring," tiin a sawi.

Zanin dar 12:15 hian Sarri enkawl Lazio-in Inter Milan an lo mikhual dawn. Italian manager sawi dan aṭang chuan champion tum pahnih inkhel tur an ni dawn a, a chesual zawk nih an duh dawn lo - season hmasa khan Stadio Olimpico-ah hian an inhnehtawk.

Inter hian Chelsea aṭangin Romelu Lukaku an lalet a, forward Lautaro Martinez an neihsa bawk avangin tlarhma lam an ngaihtuahawm loh. Belgium international leh Argentina hmatawng te inkawp hi Serie A champion thei an ni tih Sarri-a'n a hriat a ngai dawn.

Sarri chuan, "Inter hian chak tumin min rawn nawr ngei ang tih pawh kan ring, chumi lo ven dan tur chu keini pawhin kan hria. Mahni inven ringawt a ni dawn lo a, keini pawhin goal khung kan tum ang," a ti.

Laizo hian Italian forward ṭha mi Ciro Immobile an nei ve tho a, season hmasa league goal 27 khungtu hian tun season bikah pawh goal khat a khung leh tawh - engtik lai mahni Immobile hi ven awlsam a ni ngai lo; Inter tlarhnung tan inthlahdah a thiang lo ang.