Mourinho enkawl Spurs an mawi UCL - Chelsea, Leicester leh Man Utd?

Tottenham Hotspur khelh danah Jose Mourinho kut hnu hmuh tur a awm a, Pathianni zan khan Leicester City 3-0 in an sawp. Spurs tan Harry Kane a vul a, goal ropui pahnih khungin Son Heung-min hnathawh vangin Foxes defender James Justin-a'n an lamah a ti lut.

Mourinho hoten point thum an hmuh avangin season thara Europa League khel turin an dinhmun a ṭha sawt a, Foxes erawh palinaah awm chhunzawm mah se panganaa awm Manchester United aia an dinhmun ṭhatna chu goal khung tam lamah chauh a ni tawh.

Leicester City-in season tharah Champions League khelh ngei an tum a, an player pawimawh James Maddison leh Ben Chilwell te hliam vangin an khel thei lo a, defender pawimawh Caglar Soyuncu hrem ni bawk mah se a tir aṭangin a nawrtu zawk an ni.

Manager remhria Mourinho-a'n a khingpuite dinhmun a hre chiang a, goal venghim tura beh a hreh loh rualin a vuak let dan tur a duang tel. Minute rukna lekah Spurs forward Kane-a ball pek chu Son-a'n um lutin box chhung chiahah goal-ah a pet a, defender Justin-a'n a dan per avangin keeper Kasper Schmeichel tan dan ngaihna a awm lo.

Premier League top scorer ni lai Jamie Vardy hmangin Foxes-in Spurs an rum ṭhaih a, Hugo Lloris-a rinawm tlat. Foxes rawlthar duhawm Luke Thomas-a'n vei lam aṭangin cross ṭha zet a nei a, Ayoze Perez-a'n a awm a la thlain goal-ah volley hman mah se keeper Lloris-a'n mak takin a dang. Kum 19 mi Thomas hi chhinchhiah a fuh ang.

Mourinho naute erawhin a bu ang thlapin counter attack an nei a, minute 37-naah Giovani Lo Celso-a'n chak taka ball kalpuiin vei lama amah thlawptu Lucas Moura a pe. Brazil midfielder hian chak taka tlan lut Harry Kane tan a pe leh a, English striker hian vawi khatah pet nghalin team goal ropui an khung. Lo Celso, Moura leh Kane ten ball an khawih vek a, ball khawih ve miah loa Foxes defender ti buai tura tlan lut Son-a  hnathawh pawhin fak a phu hle.

Spurs goal thumnaah erawh Kane a class sanzia a lang. English striker hian Moura hnen aṭang bawka a ball hmuh chu box vei lam sir aṭanga petna tur insiam kaw chawpin goal kilah tak minute 40-naah a khung. Foxes-in second half-ah Demarai Gray leh Kelechi Iheanacho te hmangin chance nei bawk mah se keeper Lloris an paltlang zo lo. 

Tottenham manager Jose Mourinho chuan, "Ruahmanna kan siam ṭhain ka hria, kan ṭhat dan turin berin kan khel a ni. Tunah chuan parukna ni turin theihtawp kan chhuah ang, chutihrualin club dang result-a innghat loa kan thlen san theih ber chu pasarihna a ni thung. Kan thlen chin chu eng pawh ni se tuna kan hmasawnna hi season thar atan a pawimawh," tiin a inkhelh danah a lungawi thu a sawi.

Spurs hian Mauricio Pochettino hnuaiah season an ṭan ṭha lo a, league-ah 14-naah awm hmanin match hmasa 12-ah vawi thum chauh an chak. Mourinho-a hnathawh rawn lang chhoin tunah chuan Europa League khelh beisei zingah an tel leh tawh.

Leicester chungchang sawiin Mourinho chuan, "Brendan Rodgers hian Leicester tan hna ṭha tak a thawk a, tunah erawh player inhliam vangin harsatna a tawk. A harsatna tawh hi ka paltlang tawh a nih avangin ka hriatthiam pui hle," tiin a sawi.

Premier League aṭanga Champions League khel turin Liverpool leh Manchester City an tling chiang tawh. Leicester City erawh an chak loh bakah goal thum an chhuah avangin an dinhmun a ṭha lo. Nilaini zanah Manchester United-in West Ham an hmachhawn dawn a, Ole Gunnar Solskjaer hote hi goal thuma an chak a nih chuan match tawp berah Foxes lakah goal khatin chak lo se Champions League an khel thei dawn.

Chutihrualin pathumnaa awm Chelsea dinhmun a la him bik lo. Frank Lampard-a hote hian champion thar Liverpool leh Wolverhampton Wanderers an la hmachhawn dawn a, vawi khat tal an chak lo a nih chuan Champions League khelh loh theih dan a la awm.