Aguero hi legend a ni - Guardiola

'Legend' tih ṭawngkam hi a nazawnga hman a tam ta deuh a, Sergio Aguero erawhin Manchester City legend nih a inhmeh thlap. Pep Guardiola pawhin, "Legend a ni. Record a siam ni a ka awm ve thei hi ka tan chuan chawimawina a ni," tiin Argentine striker a fak.

Aguero hian Villa laka hattrick a siam chiah hian Premier League goal 177 a khungna chiah a ni a, England ram pawn player zinga goal khung tam ber record a siam. Argentine striker hian Arsenal legend Thierry Henry record goal 175 a khum chiah a, Frank Lampard-a goal khung zat tluk pha chiahin Alan Shearer, Andy Cole leh Wayne Rooney te chiah a tluk lo.

Kum 31 mi Aguero chuan, "Hnehna kan chan avangin ka lawm a, mellung thar ka kai hi minti phurtu a ni. Player ropui tak tak Thiery Henry, Frank Lampard leh Alan Shearer te nen huang khata ka awm hian minti hlim hle," tiin a sawi.

Aguero contract hi 2021-ah a tawp dawn a, Guardiola chuan July 2011-a Atletico Madrid aṭanga pound maktaduai 40-a Man City zawmtu hian contract thar a ziah a la beisei hle. Spanish manager chuan, "A tlutluknaah a innghat.

Amah ang player hi chu an tam lo. English football tihausatu a ni a, Premier League tihlutu a ni," tiin a sawi.

Lionel Messi fak telin Guardiola chuan, "Khawvela ṭha ber chu Lionel Messi a ni. Messi hi number 9, 10, 11, 6, 4-ah pawh a ṭha vek. A dawtah chuan Sergio," tiin Barcelona fachuam a dah sang hle.