Turkey champion chu Basaksehir

Istanbul Basaksehir chu a vawi khat nan Turkish Super Lig champion an ni ta. League match khelh hmabak pakhat la nei mah se pahnihna Trabzonspor tan umphak theih an ni tawh lo.

Pathianni zan khan Mahmut Tekdemir-a goal khat hmangin Kayserispor 1-0 in an hneh a, inkhel dangah an elpui Trabzonspor chu an mikhual Konyaspor lakah 4-3 in an tlawm ve thung; an inthlauhna chu point sarihah a kai chho a ni.

Basaksehir hi tun hmain Super Lig-ah hian pahnihna ṭum hnih an ni tawh. Season hmasa mai pawh khan khelh hmabak pali an la neihah hma an hruai a, a tawp lamah an zuih thung. Season a tawp meuh chuan champion Galatasaray an phak lohna chu point hnih a ni.

Kuminah erawh thawnthu a danglam ta, hun rei tak an nghah tawh league nomawi an chawi. Hlawhtlinna an chan theih nan hian Premier League-a hming chher tawh Demba Ba, Martin Skrtel leh Gael Clichy te chu player pawimawh an ni phak.