Tlai dar 3:15-ah MFA Super Final Rematch

Chhinga Veng FC-in coach Lal­sangzuala Hmar hnuaia an nomawi hmasa ber chawi turin Chanmari West FC chu MFA Super Cup final-ah 5-0 in an sawp. Vawiin tlai dar 3:15 hian Rajiv Gandhi Stadium-ah West Warrior leh Chhingcows te tun kar chhunga a vawi hnih nan an inkhel dawn a, Great Sports I Day Football hi group stage aṭangin a hmuhnawm nghal ang.

Chhingcows fiahna
Chhinga Veng hi tun season-a inelna hmasa berah an champion a, match riat khelhah goal 46 khungin harsatna an tawk lo. An inkhelh tawhna aṭanga thlirin Chhingcows tan harsatna tur niin a lang lo mah se team enkawltute erawhin chak chiangah an inngai lo.

Chhingcows assistant coach Anand Gurung chuan, "Chanmari West hian a aia ṭangin min rawn bei let dawn a, kan hmachhawn tur team hi sakei hliam ang mai a ni dawn. Chuvangin kan fimkhur a ṭul dawn a, awmze nei taka kan do let a ṭul a ni," tiin Vanglaini a hrilh.

Chhinga Veng hian forward Lalrammuanpuia chu inhliam vangin an chhawr thei dawn lo a, amaherawhchu Kelkang tlangval Lalkhawpuimawia (Mapuia) a dam tawh a, final-a inkhel bul ṭantu MS Dawngliana leh Malsawmfela te an la awm bawk.

Tlarhnungah Armed Veng South tlangval R. Lalawmpuia (Mapuia) chhawr theihin a awm leh tawh a, MFA Super Cup best defender Lalrinchhana nen an inkawp nghal a rinawm.

An zam lo
Chanmari West coach HC Zarzoliana chuan, "MFA Super Cup final-ah goal nga kan chhuah a, amaherawhchu Chhinga Veng goal khung zawng zawng kha kan tihsual vanga lutah ka ngai a, kan khel ṭha tawk lo bawk," tiin an inkhelh tawhna aṭanga teh theih a nih loh thu a sawi.

West Warrior hian final khel thei lo Calvin Zosiamliana an chhawr thei tawh dawn a, tlar­hnung a phui sawt ang. Amah­erawhchu tlarhma lama player pawimawh Lalremruata an chhawr thei dawn lo a, kumina Mizoram junior team striker R. Lalthanmawia'n hming chher theihna hun a nei ang.

West Warrior coach Zara chuan, "I Day Football hi ngaihthah theih a ni lo a, group stage-a tlak a thiang lo. A sang thei ang ber thleng turin theihtawp kan chhuah ang," tiin Vanglaini a hrilh.

Chanmari West hi Group B-ah Chanmari FC, Mizoram Police FC, Chhinga Veng FC, leh Rhino Charge te nen an awm ho a, vawi khat ṭheuh inkhelh kual hnuah a sang pahnihin semifinal an lut ang.