Sanchez-a'n training a zawm ang - Arsene Wenger
Premier League ṭan hun a hnai a, club tin inbuatsaihna chuan a vawrtawp a thleng chho mek. Arsenal manager Arsene Wenger-a'n Pathianni hian a player duh lai Alexis Sanchez chuan team training a zawm tur thu a sawi.
Confederation Cup khelh vangin Chile international Sanchez leh Germany defender Shkodran Mustafi te chu player dang aiin chawlh pek rei bik an ni a, Australia leh China-ah pawh an zin ve lo - tunah erawh Emirates FA Cup khelh laia training nei hman tura koh an ni.
Gunners manager Wenger chuan, "Alexis leh Mustafi te tan Pathianni hi an training session hmasa ber a ni ang. An chawlh chhung khan engtiangin nge an taksa an enkawl tih hriat a pawimawh a, an
ṭhiante fitness ang nei turin an thawhrim chhoh a ngai dawn," a ti.
Arsenal hian an mahni tournament buatsaih Emirates Cup khel turin kuminah Spanish club Sevilla, Portuguese club Benfica leh season hmasa Bundesliga pahnihna RB Leipzig an sawm. Pathianni zan hian La Liga club Sevilla hi an hmachhawn ang - Wenger thusawi dan hmangin an ṭhiante inkhelh laiin Sanchez leh Mustafi te hian training an nei dawn tihna a ni ang.
Kum 28 mi Sanchez hian a contract neih lai a pawh sei duh rih loh avangin tun nipui transfer chhunga chhuak ngei tura ngaih a ni a, manager Wenger-a'n training tura an kir tur thu a sawi hnu lawkah Barcelona forward hlui hian social media lamah a dam loh thu a tarlang, hei hian sawi zui a hlawh hle.
Gunners player manto ber Alexandre Lacazette chuan Emirates Stadium-a a match hmasa ber atan zanin dar 8:50 hian Benfica a hmachhawn beisei a ni a, hetih lai hian Sanchez leh Mustafi te bakah European Under-21 Championship khela kal Spain rawlthar Hector Bellerin te erawh August 6-a Chelsea nen Community Shield an khelh hunah an inlan theih chauh beisei an ni.