Mama'n Aizawl FC a zawm

I League champion Aizawl FC-in Mizoten professional football kawng an zawh theih nana sulsutu S. Malsawmtluanga an lalut a, team enkawl turin Portuguese coach Paul Jorge Coelho Menezes an lalut bawk.

Tata Football Academy chhuak Mama hian Aizawl FC-ah a larchhuah pui number 28 a ha dawn a, Mizo football legend tia sawi ngam Mama'n Mizo club zinga I League khel thei awm chhun Aizawl FC a zawm hi tualchhung football ngaina tan chuan chanchin lawmawm a ni.

East Bengal player hlui Mama chuan, "Mahni in lum ngei aṭanga India rama inelna sang bera khelh hi ka châk ṭhin a, hun remchang ka nei thei hi ka lawm hle a ni. Kolkata club leh Goa club-ah te ka khel tawh a, teammate-te mahni in lum aṭanga an khel kha ka awt ṭhin hle. Tunah chuan khatiang dinhmunah khan ka ding ve tawh dawn a, Aizawl FC-in min ring ngam a, hun ṭha min pe hi ka lawm a ni," tiin Vanglaini a hrilh.

Mama hian season liam ta khan I League second division Southern Samity tan a khel a, hemi hma hian India ram club lian East Bengal, Mohun Bagan, Salgaocar leh United SC tan a khel tawh a, Indian Super League-ah Delhi Dynamos FC tan a inlan tawh bawk.

Kum 2002 aṭanga East Bengal tana khel ṭan tawh Mama chuan, "Aizawl FC hi India rama club

ṭha ber chu kan ti ngam lo ang a, amaherawhchu ngaihven hlawh ber zinga mi chu a ni. I League champion an nih bawk avangin Mizo club-a khelh hi a châkawm a, hmabak erawh a huphurhawm hle. AFC-in nomawi an chawi leh theih nan ka theihna zawng zawng chhuah ka tum a, Mizo mipuite pawh min ṭawi­awm turin ka ngen a ni," tiin a sawi.

MFA-in tualchhung player transfer hun khar tawh mah se inter state transfer erawh a la tih theih a, Mama hian I Day Football a khel nghal thei dawn tihna a ni.

Aizawl FC player thar Mama chuan, "Training zawm vat duh mah ila Kolkata-ah tihfel ngai ka la neih avangin ka rawn la haw thei lo a. Karleh hian ka rawn thlen ka beisei a, Aizawl FC tichak turin theihtawp chhuahin training ka zawm nghal ang," tiin team thar zawm a châk tawh thu a sawi.

Aizawl FC-in Mama an lakluh thu an puan hnu lawkah coach thar an neih thu an puangzar nghal. AFC coach thar Paul Jorge Coelho Menezes hian season khat chhung atan contract a ziak a, kum 39 mi UEFA Pro License nei coach hian I League champion puitu Khalid Jamil a thlak ang.

AFC technical director Hming­thansanga chuan, "Paul Jorge hi agency kaltlanga kan lak a ni a, Spain national team coaching staff zinga a tel tawh hi kan awhna lai ber chu a ni. Coach lar Vicente del Bosque puitute zinga mi a nih avangin a hnuaiah hian thil tam tak zir tur a awm dawnin kan hria a, kan ṭhat pui kan beisei bawk. Amah hi kum 39 mi lek a ni a, player nena an kum inthlau lo hi kan duhna chhan pakhat a ni," tiin an coach thar chungchang a sawi.

Portuguese coach Paul Jorge hian karleh hian Mizoram a rawn thlen beisei a ni a, team enkawl hna a ṭan nghal ang.