Dortmund-in Bellingham an lalut

Birmingham City rawlthar Jude Bellingham chu Borussia Dortmund-in an chang. German club hian kum 17 mi Bellingham manah hian pound maktaduai 25 bawr vel an sen rin a ni a, khawvela kum 17 mi footballer manto ber a ni.

Bellingham hian Ningani khan medical nei turin Dortmund a thleng a, contract an ziakfel nghal. English rawlthar duhawm hi Manchester United pawhin lak tum mah se Bellingham hian Manchester City aṭanga Dortmund zawmtu Jadon Sancho hnung zui a thlang ta zawk.

Stourbridge, England-a piang Bellingham hi 2019–2020 season-ah Birmingham tan vawi 43 zet a inlan a, league-ah goal li a khung. Dortmund-ah hian kar khatah £52,000 a hlawh ang. Dortmund sporting director Michael Zorc chuan, "Bellingham hian inrintawkna nen Borussia Dortmund-a a career chhunzawm a thlang. Kan club a thlan chhan bul pui ber chu khelmuala tihsak theih kan ngah vang a ni," tiin a sawi a, English rawlthar Bellingham hian a hnampui Sancho ang thoin khelhna hmun a hmu tam ngei ang.