Kan inthlah dul dawn lo - Ṭialthawnga

Mizoram Police-in MFA Super Cup semifinal an thleng a, thlen chin aṭanga hmasawn an tum. Vawiin tlai dar 1:00 hian Police-in I Day Football-a an match hmasa berah Chanmari FC an hmachhawn dawn, coach Ṭialthawnga chuan, "Kan inthlah dul dawn lo reng reng, kan ṭang mar pat ang. Kan chak ngei pawh ka ring," tiin an thawhrim chhunzawm thu Vanglaini a hrilh.

Thawnthu hlui

Police leh Chanmari hi an inhmachhawn fo tawh a, 2013 I Day Football semifinal-a an intawn ṭum kha hriat reng tlak a ni. Mizo coach ṭha H. Vanlalthlanga hnuaiah intuai thar Chanmari FC-in champion lai Mizoram Police chu RG Sta­dium-ah an inkhel a, chak zawk awm turin minute 120 khelh a ni.

August 12, 2013 inkhel­ah hian Police-in F. Lalrin­puia hmangin hma an hruai a, Chanmari FC-in H. Lalmuan­kima hmangin an sut thung. Minute 90 chhungin goal khat ve ve an khung a, extra time-ah Lalruatfela Zote hmangin Chanmari FC-in hma an hruai let ve thunga a, Valpuia hmangin Police-in an sut.

Minute 107-naah Chanmari tan an veng tlangval Jerry Mawihmingthanga'n chakna goal a khung a, inkhel hmuh­nawm bika player theihna sang bikin goal pawimawh a khung hian inkhelh hlutna a tisang sawt. Coach Thlanga hnuaiah Chanmari FC an champion zui a, amaherawhchu Police leh Chanmari hian I Day Football-ah nomawi an chawi leh tawh lo.

Fakzuala tel loin

Police-in MFA Super Cup semi­final-a Chanmari West an hneh loh ṭumin an striker pawimawh Lalfakzuala a inhliam a, inelna neih zawh taka goal riat khungtu forward hian Chanmari a hmachhawn thei dawn lo.

Coach Ṭiala chuan, "Fak­zuala hi kan player pawimawh tak a ni a, chutihrualin a thlak­na turin Fakawma leh Sanga te kan nei a, kan buai phah lo ang. Team chakna atana pawimawh ber chu ṭan­rual a ni a, chak turin kan ṭan­rual ṭhat a ṭul dawn a ni," tiin a sawi.

Hun a la ngai

Chanmari FC-in coach H. Van­­lalthlanga an lak let leh hnuah kalphung thar an nei a, transfer lai pawhin player langsar la loin player beiseiawm rual an la khawm.

Veteran coach Thlanga chuan, "Kan squad-ah hian beiseina sang tak ka nei a, chutihrualin kan ṭhat­na tak lang chhuak tur chuan hun kan la mamawh deuh. Police kan hmachhawn dawn avangin tawnhriat nei ṭha player ka neih ang ka chhawr ang," tiin awmze neia player a rem tur thu a sawi.

Chanmari hian MFA Super Cup-a an match hmasa berah Aizawl FC chu penalty shootout-ah an hneh lo a, Police hian I League club hi 4-3 in an hneh thung. Amaherawhchu, tun ṭumah hian Thlanga hian winger tlan chak Lalmuanzova a chhawr thei tawh dawn a, goal nawr tura Vanlalbiaa Chhangte leh PC Zosanga te a neih bawk avangin Police tlarhnung tibuai thei tur player an nei tih a chiang a ni.