Real leh Barca ang Kan la ni lo - Mourinho

Manchester United manager Jose Mourinho chuan khawvela player manto ber Paul Pogba chu Barcelona leh Real Madrid player-te anga ṭha a nih thu a sawi rualin Spanish club pahnihte tiatpui an la nih rih loh thu a zep lo.

United hi season thar inbuatsaih nen United States-ah International Champions Cup khelin an zin zo tawh a, Pathian­ni zan dar 10:30 hian Norwegian club Vale­renga an hmachhawn ang a, karleh Nilainiah Italian club Sampdoria nen an inkhel leh bawk ang.

Kum 54 mi Mourinho naute hian an match hma­sa lamah La Liga leh Champions League nomawi kawl mektu Real Madrid chu penalty shoot out-ah an hneh a, Barcelona erawh Neymar-a goal khat hmangin an ngam lo.

United manager Mou­rinho chuan, "Real leh Barca player ṭhenkhat hi chu mimal chauh pawha ṭhatpui tham an ni a, kan nei vek thei lo. Heng club pahnihah hian khawvela a ṭha ber ber an awm tih chu kan pawm thiam tur a ni. Amaherawhchu game plan hmangin heng team te hi hneh theih an ni," tiin a sawi.