Mayweather vs McGregor: Ticket a to

August 26 a lo thleng ang a, khawvel nghahhlelh weight division panga champion ni thei Floyd Mayweather leh UFC lightweight champion lai Conor McGregor-te chu T-Mobile Arena, Las Vegas-ah an inhnek dawn.

Fighter ropui pahnih inhnek tur hi a hmunah mi 20,000 bawr velin an en thei dawn a, ticket zawrhchhuah a nih hnuah ticket hralh chhawnna lam webiste-te an che na hle - StubHub-in an zawrh chhawn ticket manto ber chu £115,000 (Rs. 96,45,747) a ni! Ticket tlawm pawl pawh £75,000 (Rs. 62,90,704) a tling hial.

Mayweather leh Manny Pac­quiao-te kum 2015-a an inhma­chhawn ṭum khan hetianga ticket lei tawh manto tak taka hralh­chhawn leh hi a tam em em a, hemi laka inven nan hian fighter pahnih an inhnek theih nana hma latu ber UFC president Dana White chuan ruahmanna a siam.

Ruahmanna ang chuan ticket hralh chhuaktu website lar tak Ticket­master aṭang chauhin ticket hralh a ni ang a, mi pakhatin ticket pahnih aia tam a lei thei lo ang. Ticket lei tur pawh hian Ticketmaster member nih a ngai a, £153 (Rs. 12,833)-a an lei an code hmang chiahin ticket lei theih a ni.

Mahse, Dana White beisei angin thil a kal lo. A code zawk hi online a thil zawrh chhawnna Ebay velah an zuar chhawng hlauh a, £385 (Rs. 32,292) - £7,706 (Rs. 6,46,348) inkar vela zawrh chhawn niin hei hian ticket zawrh chhawn leh pawh a tih awlsam phah. StubHub chuan ticket zawrh chhawn manto ber £115,000 (Rs. 96,45,747) man hi an la hralh loh thu an sawi a, £2,500 (Rs. 2,09,690) chu ticket man laihawl niin a tlawm ber chu £1,433 (Rs. 1,20,194) in an zuar chhuak thung.

Dana White chuan ticket chungchangah hian, "Ticket chungchangah hian thil tam tak a thleng thei tih ka hria a, tuna kan zawrchhuahna pawh hi a man a to tawk tawh. He fight-ah hian mi tupawh kan hlawk tawk tawh a, ticket zawrhchhuahnaa duham vak hi ka duh lo. Mi zawng zawngin ticket an lei vek dawn a, keipawhin ka duh chuan ka lei mai ang a, Conor leh Floyd pawhin an lei ang," tiin a sawi.

Hetihrual hian Mayweather Promotions chuan fighter pahnih inhmachhawn lai hi USA-a Cinema Hall 400-ah an chhuah dawn a, organiser Fathom Events chuan ticket zawng zawng hralh zawh vek an inbeisei thu an sawi. Hall-a fight enna man hi £31 (Rs. 2,600) a ni ang.

Pay-per-view, ticket sales, sponsorship, merchandise sales, cinema ticket leh a huhoa enkhawmna hmun aṭang tein Mayweather leh McGregor fight turah hian dollar maktaduai 600 lai hmuh beisei a ni.