Ramhlun North an lian; Aizawl FC an vannei

Ramhlun North-in club ṭha an ni tih an pholang ta a; Aizawl FC erawh chak turin vanneih an mamawh.

Great Sports Independence Day Cup 2017 chu nimin khan Rajiv Gandhi Stadium-ah khelh ṭan a ni. I League champion Ai­zawl FC-in Nigerian defen­der Kareem Omolaja freekick hmangin Bethlehem Vengthlang FC chu 2-1 in an hneh a; Ram­hlun North FC-in player 10-a khel Dinthar FC chu 4-1 in an hneh.

I Day football ni khatnaah goal riat lutin heng zinga goal thum hi foreigner khung an ni.

Group A lama state pawn team awm chhun AIFF Under 19 chuan Mizoram an rawn thleng tawh a, Thawhṭanni hian I League champion AFC an hmachhawn ang.

Kareem a langsar

Aizawl FC-in Bethlehem VT lakah ball an chang tam a, minute 18-naah Lalrinzuala Khiangte hmangin goal hmahruai an khung. Aizawl Venglai tlangval Rinzuala hian corner aṭanga ball per chang fuhin a pet goal a, BVT tlarhnungin an insiamrem har an tuar.

I League club-in inkhel thunun zawk mah se an tlarhnung a phui bik lo. AFC defender Kareem-a'n box chhungah BVT winger Laldinliana Varte a titlu a, penalty a chawi. College Veng tlangval B. Zoramthara rawn pen chhuakin AFC keeper Lalremruata a bum a, an si phurh a sut.

Second half-ah Nigerian defender Kareem-a'n a tihsual siam ṭhat nan box pawn chiah aṭangin freekick aṭangin a khung a, Minerva Punjab tana Aizawl FC lama freekick khung tawhtu ball pet hi a kawh avangin keeper Lalruatpuia dem chi a ni lo.

BVT lamin goal hlauhawm an nei ve zel a, captain Rammawia'n goal ban a pet per a, hemi per chang fuhtu Vanlalthanga'n goal-ah a pet nachungin AFC defender Lalrinzuala'n goalline aṭangin a pet chhuak.

AFC defender tihsual nang­fuhtu Rammawia'n ṭha taka a lakluh hnuah Ramengmawia tan goal khung ngeina tur goal ṭha a siamsak a, Vanchengpui tlangval hian AFC keeper Lalremruata zawnah chiah a pet leh bawk. BVT-in an si phurh an sut nawn thei lo a, I League club 2-1 in an chak.

Aizawl FC hi team ṭha zawk ni mah se, BVT hian 'vanduai' an inti khawp ang.

Danglamna red card

Nimin inkhel hnuhnung zawkah Ramhlun North tan Lalliansanga a che ṭha a, Dur­tlang tlangval Notea hi Dinthar FC tan buaina tham a tling.

Minute 38-naah Notea hian ṭha takin a lalut a, Stephen Lal­nun­mawia'n box pawnah a titlu. Dinthar FC defender Steve hian yellow card vawi hnihna a hmuh avangin hnawhchhuah a ni a, player 10-a an khelh hnuah Maimawms an talbuai zui.

Box chhungah Dinthar defender R. Lalthantluanga kutin ball a per avangin penalty a chawi a, minute 41-naah C Ramdinmawia'n Dinthar keeper bumin penalty hi a khung.

Minute li hnuah Notea bawk a rawn inlar a, Durtlang tlangval hian Mohun Bagan winger hlui Lalrinfela ball cross duhthusam chu a tauh lut a, half time-ah 2-0 a ni.

Second half minute 63-naah RNFC-in Mizorama tawnhriat nei tawh foreigner Oneyeama Francis an luhtir a, amaherawhchu player tlem zawk Dinthar FC-in goal an khung thung.

Maimawms beiseina siam turin David Lal­rin­chhana'n a club hlui lakah pe­nalty a hlawh chhuak a, Sa­muel Laltlanthanga'n goal-ah chantirin minute 78-naah 2-1 a ni.

Ramhlun North-in goal venhim aia goal khung belh ngai pawimawhin Nigerian striker pakhat zawk Olaniran Joseph Segun an luhtir nawn leh sak a, coach Lalruatliana Sailo-in (Tawia) thutlukna a siam fuh. Joseph luh aṭanga minute khat lekah Francis-a'n goal a khung a, injury time-ah Francis bawkin khung belhin he goal hi Joseph siamsak a ni. Hun a tawp meuh chuan Ramhlun North 4-1 in an chak.