Sharapova-i'n wildcard a hmu

Tennis khel turin Maria Sharapova a inpeih leh tawh a, August 12-20 chhunga khelh tur Cincinnati WTA tournament chuan wildcard an pe.

Player tu pawh, hliam leh harsatna dang vanga an ranking hniam tak, inelna tak hmachhawn tura tling phak lo, tun hma lama sulhnu ṭha hnutchhiah tawh leh inelna buatsaih tuten an duhsak hnehnah 'wildcard' hi pek ṭhin a ni.

Grand Slam vawi nga champion tawh Sharapova hian thla 15 hrem a nihna a hmang zo tawh a, hliam vangin grass court season a hmang thei lo - inelna lian Wimbledon pawh a khelh theih loh phah hial.

Tun dinhmuna world number 171 Sharapova hi US Open khel turin a inbuatsaih mek a, hard court-a khelh ṭhin Cincinnati Open a khel thei tur hi a tan inbuatsaihna ṭha tak a ni thei ngei ang.

Cincinnati Open tournament director Andre Silva chuan, "Inelna kan buatsaih turah hian world number 1 a tel ngei kan duh a, a khingpui turin player ṭha an inlan kan duh bawk," tiin Sharapova chu khawvela a ṭha berte khing phak zingah a la dah. Kum 30 mi Sharapova hian 2011 khan Cincinnati Open nomawi hi a lo chawi tawh a ni.

Khawvela hmeichhe infiammi zinga sum lalut hnem ber ni ṭhin Sharapova hi meldonium a hman vangin hrem ni mah se hremna a tawrh zawh hnuah turnament tam tak chuan an inelna tel turin an la duh hle tih a chiang.