Inter lakah Bayern tlarhnung a pawp

Inter Milan chuan an striker Martins Eder goal hnih khung hmangin Bayern Munich chu si hnih faiin an hneh a, coach thar Luciano Spalletti kaih­hruaina hnuaiah Italian club hian season thar inbuatsaihna an nei ṭha hle.

Ningani zan Singa­pore National Stadium-a inkhelah tun hnaia Man­chester United nena sawi zawm mek Ivan Perisic chu khelmualah a lut a, goal an khung theih nana tha thawhtu pawimawh ber pakhat a ni. Inter hian an match hmasa zawkah Lyon chu si khat faiin an hneh tawh bawk.

German champion Bayern hi Arsenal laka an tlawm hnuah Premier League champion an hneh thei a, tunah erawh Serie A team vantlang Inter lakah an tlawm leh ta - match thum chhungin goal nga an chhuah tawh.

Carlo Ancelotti-a'n hliam vangin keeper Ma­nuel Neuer a la chhawr thei lo a, Germany inter­na­tional hmun ruak hnawh khat zo an awm lo tih a chiang. Bayern captain thar Neuer hian season bul a ṭan theih beisei a ni.

Inter lakah forward Thomas Mueller leh Renato Sanches te chu inkhel boruak thlak turin second half-ah luhtir ni mah se danglamna an siam thei lo a, Kingsley Coman leh James Rodriguez te pawhin Inter goalkeeper Samir Handanovic an paltlang zo bik lo.

Bayern-in an chak loh piah lamah thu lawmawm loh dang an nei, winger Franck Ribery chu hliam vanga lakchhuah a ni. France international hlui hi season hmasa khan hliam vangin a buai fo tawh bawk.

Bayern coach Ance­lotti chuan, "Ribery hi a kerek a hliam, ni thum emaw ni li emaw a chawlh a ngai dawn. A pawimawh ber chu player tinin hma kan sawn a ngai, tunah hian hun tlem kan la nei a, hmasawnna kan neih theih ngei nan kan hun tlemte neih hi a ṭha thei ang berin kan hmang ang," a ti.

Bundesliga khelh ṭan a nih hmain August 5 hian Bundesliga champion Bayern leh German Cup champion Borussia Dort­mund te chuan DFL-Super­cup an khel dawn a, he hunah hian Ribery hi a rawn kir theih beisei a ni.