Chelsea player loan-in an chhuak zel

Premier League champion Chelsea chuan an player pahnih ngawt loan-in an kal chhuahtir leh ta, defender pahnih Tomas Kalas leh Michael Hector-te chu season khat chhung club danga khel turin loan-a chhuahtir an ni.

Kum 24 mi Tomas Kalas hian Stamford Bridge-ah kum li dang cham turin contract a ziak phawt a, contract thar a ziah hnuah season hmasaa loan-a a lo khelh tawhna Fulham lamah kirtir a ni. Czech Republic tana vawi 10 inlan tawh defender hian July 2010-ah khan Sigma Olomouc aṭangin Blues hi a zawm a, match li chiah a la khelhsak. Season hmasaa Fulham-a loan-a a khelh khan match 40 ngawt a inlan thung.

Michael Hector hian season hmasa khan German club Eintracht Frankfurt-ah loan-in hun a hmang a, tun season-ah erawh Hull City tan a khel dawn. Premier League aṭanga tla hlim club a zawm chiah hian loan-a khelhna club 14-a neihna chiah a ni.

Jamaica international hian Bracknell Town, Didcot Town, Havant and Waterlooville, Oxford City, Horsham, Dundalk, Barnet, Shrewsbury, Aldershot, Cheltenham, Aberdeen, Reading leh Frankfurt tan a khel tawh a, heng zingah hian non-league club panga an tel.