Los Angeles boss thar Bob Bradley

Swansea City boss hlui Bob Bradley chuan MLS club thar Los Angeles FC a enkawl dawn. Kum 59-a upa manager hi season hmasa khan American zinga Premier League manager hmasa ber ni turin Swansea chuan an lalut a, mahse ni 85 chiah a enkawl hman tihin December 2016-ah ban lehnghal a ni - hetih chhung hian match 11 enkawlin match hnih chiah hnehna a chanpui.

Los Angeles hi mi 27 intelkhawm pawlin an enkawl a ni a, he club neitu zingah hian Hollywood actor lar Will Ferrell, basketball legend Magic Johnson leh Cardiff City chairman hlui Vincent Tan-te pawh an tel a, mi 22,000 lenna California Stadium chu an khelmual atan an hmang ang.