Inter leh Roma inhnehtawk

Pathianni zan Serie A inkhelah Inter Milan leh AS Roma 2-2 in an hnehtawk a, inkhel dangah Napoli chuan Udinese 2-1 in an hneh thung. Season thara European football khel tura hmunruak inchuh boruak a nung zel.

Roma mualah Inter lamin goal an khung hmasa, defender Stefan de Vrij-a goal khung chu Roma lamin Leonardo Spinazzola hmanga an sut bakah Henrikh Mkhitaryan hmangin hma an hruai let. Hun tawp dawna Romelu Lukaku penalty khung vangin Antonio Conte nauten point an hmu hram.

Inter coach Conte chuan, "League match khelh hmabak pali la nei chungin Champions League khel turin kan tling chiang tawh, ka naute hian an ti ṭha thawkhat viau a ni. Amaherawhchu nomawi chu kan ban phak meuh lo, hrileng vanga fixtures siksawi ngai hi kan tuar hleah ka ngai," a ti. Inkhel dangah Napoli an chak avangin an chunga awm Roma an phak lohna chu point hnih chauh a ni ta. Inrinni zan khan AC Milan an chak bawk a, qualifying round khelh ngai loa Europa League khel thei nih an tum vek ang.