Tlai dar 2:30 hian Lammualah India champion vs India rawlthar ṭha rual
Great Sports I Day Football-ah vawiin tlai dar 2:30 hian I League champion Aizawl FC leh I League Under 18 champion AIFF Under 19 te an inkhel dawn.
India ram puma lang pha team pahnih Lammuala an inhmachhawn thei hi tualchhung football ngaina tan chuan vanneihna a ni.
An intawng tawh
Kum khat liam ta khan AIFF Under 19-in Mizoram chhunga an match hmasa berah Aizawl FC an hmachhawn a, Mizo club hian 2-0 in India rama rawlthar ṭha rual awm khawm hi an hneh.
Floyd Pinto kaihhruai AIFF Under 19 hian Lammuala match thum dang an khelhah Chanmari West FC (1-2) leh Chanmari FC (0-1) te an hneh lo a, an club hneh chhun chu hetih laia MPL kai thar Chhinga Veng (3-1) chiah an ni.
An ṭha tawh
AIFF Under 19-in Mizoram an rawn tlawh hmasak kha chuan team thar an din lai mek a ni a, player-te an la inhrechiang tawk lo. Tunah erawh I League Under 18-ah an champion leh tawh a, kum 19 hnuai lam inelna atana an her danglam 2017 IFA Shield-ah semifinal an thleng bawk.
India rawlthar ṭha rualah Mizoramin player paruk defender pakhat Lalliansanga, midfielder pathum Zonunmawia, Lalengzama Vangchhia leh Lalnuntluanga Bawitlung bakah forward pahnih Edmund Lalrindika leh Lalawmpuia te an awm. Heng player vang ringawt pawh hi Lammual panna tham a tling.
Hei chauh hi a ni lo a, AIFF Under 19-ah hian 2016 IFA Shield an champion ṭuma best player leh top scorer ni thei Baoringdao Bodo an ko let. Assamese rawlthar talent nei ṭha tak hi French club Metz-ah te pawh training nei tawhin Chennaiyin FC leh Minerva Punjab FC tan a khel tawh bawk a, I League-a goal khung thei naupang ber a ni.
AIFF Under 19 hian Pranjal Bhumij an kawl bawk a, Assamese forward hian nikum I League-ah DSK Shivajians tan khelin Shillong Lajong lakah goal an khung. ISL draft-ah khan Pranjal hi Mumbai City in an thlang a, ISL-a inlan tur player hi Lammualah hmuh theihin a awm dawn.
I League club hi
Aizawl FC-in Portuguese coach Paulo Jorge Coelho Meneses leh Mizo winger lar S. Malsawmtluanga an lakluh thu an puang a, vawiinah erawh coach leh player thar hi hmuh tur an la awm lo ang.
I League champion hi season liam taa I Day Football-a champion puitu captain Rohmingthanga'n a ho chhunzawm dawn a, Lengpui tlangval tan tlarhnung rem phui a pawimawh dawn.
AFC hian an match hmasa berah Bethlehem Vengthlang FC 2-1 in an hneh hram a, an khelh dan aṭanga thlir chuan AIFF Under 19 lakah Mizo club hi chak tura rinkai an ni bik lo.
AIFF Under 19 - Squad
Goalkeeper
1 Aditya Patra Kolkata
2 Mohd Haroon Uttar Pradesh
Defender
3 Lalliansanga Renthlei Mizoram
4 Amal Das Kerala
5 Nongthombam Joyasana Singh Manipur
6 Thongnam Kishan Singh Manipur
7 Novin Gurung Meghalaya
8 Deepak Tangri Punjab
9 Ashish Rai Sikkim
10 Namgyal Bhutia Sikkim
11 Sahil Panwar Uttarakhand
Midfielder
12 Zonunmawia Mizoram
13 Lalengzama Vangchhia Mizoram
14 Lalnuntluanga Bawitlung Mizoram
15 Princeton Rebello Goa
16 Wungngayam Muirang Manipur
17 Ajay Chhetri Manipur
18 Rinreithan Shaiza Manipur
19 Gaurab Das West Bengal
Forward
20 Edmund Lalrindika Mizoram
21 Lalawmpuia Mizoram
22 Baoringdao Bodo Assam
23 Pranjal Bhumij Assam
24 Naorem Roshan Singh Manipur
25 Telem Suranjit Singh Manipur
26 Suraj Rawat Sikkim
Coaching Staff
1 Floyd Pinto Head Coach
2 Kanan Priolkar Asst Coach
3 Sumedh Desai Physio
4 Mohammed Yusuf Ansari GK Coach
5 Deepak Negi Team Manager