Sanchez tel loin laipui a puak ring

Arsene Wenger-a'n Pathiannia training zawm tura a tih Alexis Sanchez chuan a damloh avangin team training a la zawm thei lo. Arsenal manager chuan a player hian Thawh­leh­niah training a zawm tur thu a sawi nawn leh.

Season hmasa Arsenal tana goal khung hnem ber Sanchez awm lo mah se Gunners hian goal khung kawngah harsatna an tawk lo. Inrinni zan khan Emirates Cup-a an match hmasa zawk an khel a, Portuguese club Benfica chu 5-2 in an sawp.

Emirates Stadium-a inkhelah Gunners tan hian Theo Walcott-a'n goal hnih a khung a, striker palian Olivier Giroud leh thun hnaia hmasawn tak Alex Iwobi ten goal khat ve ve an khung bakah Benfica defender Lisandro Lopez chuan an mahni lamah a ti lut palh bawk.

Arsenal hian nizan khan Spanish club Sevilla an hmachhawn leh a, he thu buatsaih lai hian result kan hre hman lo. Kumin Emirates Cup-ah hian inelna buatsaihtu Arsenal bakah Benfica, Sevilla leh season hmasa Bundesliga pahnihna RB Leipzig te an inlan.

Gunners manager Wen­ger-a'n kum danga a tih fo angin Confederation Cup khela kal chhuak Sanchez leh Shkodran Mustafi te bakah Euro Under 21 khel Hector Bellerin te chu player dang aiin chawlh a pe rei bik, ruahman dan chuan nimin khan training an nei ṭan tur a ni.

Mahse, Wenger-a'n trai­ning an neih tur thu a sawi aṭanga darkar 24 pawh a liam hmain Sanchez chuan social media kaltlangin a damloh thu a tarlang a, North London club tana goal 53 khung tawhtu chet dan hian sawi zui a hlawh nghal hle.

Season hnih cham belh tura contract ziaktu Wenger chuan, "Sanchez nen kan inbia, a damlo a ni. Thu thar dang a la awm lo, ani hi kan hnenah a cham chhunzawm ang," tiin a sawi.

Chile international hian Emirates Stadium-ah kum khat daih bak contract a nei tawh lo a, tunah hian pawtsei tura sawmna a la pawm thei lo. Sanchez bakah hian Mesut Ozil, Kieran Gibbs, Alex Oxlade-Chamberlain leh Jack Wilshere te pawh season tawp rualin an contract neih lai hi a tawp zui ve dawn bawk.

French manager Wen­ger chuan, "Player-te hian thlil thleng mek leh a thlen chhoh zel dan tur an thlir reng a, kum khat chauh contract an nei tawh a nih pawhin an contract neih lai chu an zah tur a ni," tiin khelmual chhunga theihtawp chhuak vek turin a player-te a beisei.