Phengphehlep aia mawi zawk Khatla TBL
Khatla TBL chuan 72-62 a Tuikual South hnehin 2017 Mizoram Basketball Association Season Opening Tournament nomawi an chawi a, hmeichhe inelna lamah Saron chuan Chawnpui 51-34 a hnehin an champion ve bawk.
Inrinni zan Hawla Indoor Stadium, Republic Vengthlanga inkhelah season hmasa champion Tuikual South lamin bul an ṭan fuh lo a, quarter hmasa ber aṭangin TBL an chungnung nghal. Mizoram Super League vawi hnih champion tawh TBL hi quarter pali zinga pathumah an chungnung zawk - Phengphehlep lam hian quarter thumnaah chauh point an hmuh san zawk avangin an nomawi kawl lai an chan.
Tuikual South hian semifinal-ah MSL champion lai Mission Veng Viking an hneh a, season hmasa final-a an hneh hnu TBL lakah pawh inrintawkna nen an khel thei tura beisei an ni. Mahse, H. Laldinsanga (Mapuia) kaihhruaina hnuaia khel TBL hian hun pawimawhah team huaisen zia an chhuah leh ta a, champion tura rinkai Zarkawt BCA an hneh hnuah state pawn player tel lo pawhin TKS lakah an thiam tawk tih an lantir zui thei a ni.