Mourinho ang nih ka hlau - Conte

Chelsea manager Antonio Conte chuan Premier League nomawi a chawi hnu season leh a an ban zui tak Jose Mourinho dinhmun ang tawn ve a duh lo a, pumpelh a duh thu a sawi chhuak.

Juventus manager hlui Conte hian season hmasa khan Blues a enkawl ṭan a, a season hmasa berah league nomawi a chawi nghal. Mourinho pawhin a ṭum hnih nana Chelsea a enkawl nawnna season hmasa zawkah league title a la nghal a, a season lehah erawh 16-na dinhmun an luah laiin an ban.

Italian manager zinga Premier League chawi thei palina Conte chuan, "Kum hnih liam ta khan Chelsea hi 10-na an ni a, khatiang thil kha a thleng nawn tawh tur a ni lo. A harsain a khirhkhan dawn tih chu kan hria, mahse Mourinho-a'n Blues a enkawl ang kha chu nih loh kan tum ang," tiin tuna Manchester United manager nilai chu a kap na hle.

Kum 47 mi Conte chuan sawi chhun­zawmin, "Tun hnaiah Chelsea leh Leicester ten nomawi an chawi zawh hnu season-ah an manager an ban zui a, khatiang thil kha a thlen ve loh nan a chinfel dan kawng rang taka kan zawn chhuah a ngai dawn," tiin kum thum daih contract a ziah chu hman zawh a tum hmel hle.

Italy national team pawh enkawl tawh Conte hna hi a awlsam dawn bik lo. Manchester United-in a zawna season thum 2007, 2008 leh 2009 a an champion bak kha chu a zawnin Premier League champion ni leh thei an awm rih lo.

Chelsea hian beisei angin season thar inbuat­saihna an nei ṭha lo. Fulham leh Arsenal te hneh mah se Bayern Munich leh Inter Milan lakah a zawnin an tlawm, season hmasa lama an innghahna bulpui pakhat an tlarhnung a a la phui lo hle.

Inrinni zan khan Singa­pore's National Stadium-ah Blues hian Inter Milan an hmachhawn a, Serie A club tan hian Stevan Jovetic leh Manchester United hellai Ivan Perisic ten goal an khung a, Inter midfielder Geoffrey Kondogbia chuan yard 40 a hla aṭangin an mahni lamah a ti lut palh bawk - AS Roma aṭanga Inter zawmtu manger Luciano Spalletti naute hi 2-1 in an chak.

Chelsea player manto ber Alvaro Morata-a'n a vawi khat nan inkhel bul ṭan mah se a man phu khawpin a khel chhuak lo. Pound maktaduai 60 man striker hian a club thar tana a goal hmasa ber chu a la nghah rih a la ngai. August 6, Inrinni zan dar 6:30 hian Wembley Stadium-ah Arsenal nen FA Community Shield an inchuh ang.

Inkhel te chu

CHELSEA (3-4-3): Courtois; Azpilicueta (Tomori), Luiz, Cahill (Clarke-Salter), Moses (Cuevas), Fabregas (Scott), Kante (Pasilic), Alonso (Rudiger 53); Willian (Musonda 65), Batshuayi (Remy 88), Morata (Boga 65).

INTER MILAN (4-2-3-1): Padelli; D’Ambrosio (Ranocchia 90), Skriniar, Miranda (Murillo 71) Nagatomo (Ansaldi 71); Gagliardini, Valero (Valietti 78); Candreva (Kondogbia 58), Brozovic (Eder 71), Perisic (Barbosa 71); Jovetic (Joao Mario 58).