Point mamawh BVT leh Dinthar
Great Sports I Day Football-ah Bethlehem Vengthlang FC leh Dinthar FC te vawiin chhun dar 12:15 hian Lammualah an inkhel dawn a, point hmu lo zawk tan semifinal beisei ngam a harsa tawh ang.
Zirtawpni inkhelah BVT hian Aizawl FC chu 1-2 in an hneh lo a, Ramhlun North lakah Maimawms 1-4 in an tlawm bawk.
Group A-ah team nga awmin a sang pahnihin semifinal an lut dawn a, team pahnih tan vawiin hi inkhel pawimawh a ni.
Bethlehem Vengthlangin goal khung an harsat a, MFA Super Cup-ah Chhinga Veng lakah goal an khung thei lo a, goal khat an chhuah bawk avangin an tla. I Day Football ṭan niah B. Zoramthara hmangin goal an khung a, amaherawhchu hei pawh hi penalty spot aṭangin a ni.
BVT coach Chawngthansanga chuan, "Ka naute kan khelh dan kalphung an bel tawh a, kan game pawh a ṭha. Football-a har lai ber finishing hi kan chak lohna lai a ni rih a, amaherawhchu training kan neih ṭhat avangin an zia chho turah ka ngai. Ka player-te hian tawnhriat a nei a, inrintawkna chiah kan mamawh tawh," tiin Vanglaini a hrilh.
Vawiin hian BVT-in inhliam vangin forward Edenthara, midfielder Lalmawizuala, defender Joseph Lalsanglura leh keeper Lalruatpuia-te an chhawr thei dawn lo mah se, coach Chawnga'n an squad a chhah ṭhat avangin an buai a rin loh thu a sawi thung.
Dinthar FC-in match hmasa berah goal li an chhuah a, BVT tana hriat tel atana ṭha erawh Maimawms hian player 11-a an khelh laiin goal an chhuah lo a, coach Lalhlupuia Sailo chuan a nu thihna vangin team a ho thei lo bawk. MPL hmasa bera champion Dinthar hian Nigerian midfielder Clarence Carter an chhawr thiam chuan BVT tan buaina tham a tling ang.
Maimawms coach Lalhlua chuan, "Tluk chhiat kan tum lo a, thawhchhuah leh vat kan tum. Chak ngei tumin kan khel dawn a, chak duhna thinlung kan neih a ṭul a ni," tiin a sawi.
Group A - Team Dinhmun
July 28, Zirtawpni - Rajiv Gandhi Stadium
Aizawl FC 2 - 1 Bethlehem Vengthlang FC
AFC : Lalrinzuala Khiangte 18'; Kareem Omolaja 58'
BVT : B. Zoramthara 28' (P)
Dinthar FC 1 - 4 Ramhlun North FC
DFC : Samuel Laltlanthanga 78'(P)
RNFC : C. Ramdinmawia 41' ; Lalliansanga 45'; Oneyeama Francis 84', 90+1'
Vawiin Inkhel Tur - Lammual
12:15 PM Bethlehem Vengthlang FC vs Dinthar FC
02:30 PM AIFF Under 19 vs Aizawl FC
August 2, Nilaini - Lammual
12:15 PM AIFF Under 19 vs Ramhlun North FC
02:30 PM Dinthar FC vs Aizawl FC
# Team Pld W D L GF GA GD Pts
1 Ramhlun North FC 1 1 0 0 4 1 3 3
2 Aizawl FC 1 1 0 0 2 1 1 3
3 AIFF Under 19 0 0 0 0 0 0 0 0
4 Bethlehem Vengthlang FC 1 0 0 1 1 2 -1 0
5 Dinthar FC 1 0 0 1 1 4 -3 0