Daniel Cormier hnehtu Jon ‘Bones’ Jones

UFC superstar Jon ‘Bones’ Jones chuan light heavyweight title la turin champion lai Daniel Cormier chu round thum­naah a knockout a, UFC heavyweight champion hlui leh WWE superstar Brock Lesnar a cho thu a sawi chhuak nghal bawk.

Jones hi kum 2015 khan mi a sut hnuah a tlan­bo avangin thubuai siamsak a ni a, a kum leh­ah damdawi hman phal loh a lo hman avangin a title kawl lai chhuhsak a ni bawk. Kuminah erawh light heavyweight kawnghren a kawl leh ta.

American fighter chuan, "Ka awih lo a, rin har ka ti hial zawk mai. Kei ang fighter ṭawi­awm reng hi thil harsa a ni tih ka hria a, mahse ka fan-ten min thlawp reng avangin an chungah lawmthu ka sawi a ni," a ti a, "Brock Lesnar nang aia kg 18 vela rihna hniam zawkin a hnek hrep dan tur che i hriat duh chuan Octagon-ah kan inhmu dawn nia," tiin a aia lian zawk fighter a cho.

Nimin zing UFC fight dangah Tyron Woodley chuan welterweight title a kawl lai humhim turin unanimous decision-in Demian Maia a hneh a, Cristiane ‘Cyborg’ Jus­tino chuan UFC wo­men’s featherweight title la turin Tonya Evinger a hneh ve bawk.

American veteran pahnih Robbie Lawler leh Donald Cerrone in­hma­chhawnah Lawler a chungnung zawk a, British light-heavyweight star Jimi Manuwa chu second 42 chhung lekin Volkan Oezdemir chuan a knockout.