Chanmari & Chhinga Veng Chak Chiang
Great Sports I Day Football-ah Chhinga Veng FC-in MFA Super Cup-a an khelh ṭhat an chhunzawm a, season thara Chanmari FC hmel hmang tur a lang ṭan bawk.
Inrinnia RG Stadium-a inkhelah hian veteran coach H. Vanlalthlanga hoten Mizoram Police 4-0 in an sawp a; Lalsangzuala Hmar kaihhruai Chhingcows-in Chanmari West chu 5-1 in an sawp nawn bawk.
Group A-ah hian MPL club pali Chanmari, Chhinga Veng, Mizoram Police leh Chanmari West bakah Assam-a innghat army team Rhino Charge-te an awm. Naktuk hian champion rinkai Chhinga Veng FC leh Police an inkhel ang a, state pawn team Rhino Charge leh Chanmari FC an inkhel bawk ang.
Chanmari thar
Mizoram Premier League champion Chanmari FC-in an nomawi humhim turin MPL an champion hmasak ber ṭuma an coach Thlanga an lalut a, MFA Super Cup-a an match hmasa berah Aizawl FC penalty shootout-ah an hneh lo nghal.
Amaherawhchu, Chanmari FC-in tum neiin club an kalpui a, season ṭan hmaa an thawm neih lenna ber pawh ISL club Pune City nena an inthlunzawm thu a ni. Hei chauh hi a ni lo a, Mizo naupang tam zawk chher chhuah tumin Sports and Youth Services nen an indawr a, hei vang hian Santosh Trophy-a Mizoram champion puitu coach Thlanga an laklet theih phah.
Chanmari hian hma thar an la a, tawnhriat nei ṭha player eng emaw zat an chhuah a, player chhera team thar din tumin rawlthar beiseiawm an la khawm thung.
Police hnehtu
Chanmari FC-in Mizoram Police lakah bul an ṭan ṭha a, PC Zosangliana'n minute lina lekah goal a khung nghal. New Builum tlangvalin goal hmahruai a khung theihna tura siam saktu Hnahthial tlangval Jacob Vanlalhlimpuia'n amah vengtu Police defender Lalhmunmawia nek perin goal hnihna a khung leh bawk.
Second half-ah pawh Chanmari tho an chungnung a, freekick hmang ṭangkaiin goal hnih dang an khung belh. Minute 49-naah PC Zosanga'n goal hnihna a khung a, tlarhnung tiphuitu C. Lalrosanga'n minute 53-naah Chanmari goal lina a khung.
Police-in goal li ngawt an chhuah avangin insiam-
ṭhat an mamawh a, goal khat lek an chhuah laia defender Lalrinchhana (Itana) inhliam an tuar a, Lalfakzuala tel loin result-ah nghawng a nei a, Chanmari keeper Lalmuanawma'n khelh ṭhat ni an tawng bawk - Police buai belhchhahna chu second half-a ṭul lo taka referee hnialtu Lalbiaknunga red card hmu kha a ni.
Police hi champion thei ni mah se, tla thei an ni tel - MPL aṭanga relegate nawn an duh lo a nih chuan insiamṭhat dan kawng an zawn nghal a ṭul ang.
Chhinga Veng an thiam
Chhinga Vengin coach Lalsangzuala Hmar an neih hnuah MFA Super Cup nomawi an chawi satliah lo a, player ṭha nei chungin game mawi an khel. Lammuala West Warrior laka goal nga ngawt an khung kha an vanneih vang a ni lo a, RG Stadium-ah pawh goal nga tho an khung.
MFA Super Cup top scorer leh best forward Malsawmfela'n minute 9-na lekah goal ropui a khung nghal a, Chanmari West tana vawi khat inlanna veteran keeper Vanlalhriata tan dan theih rual a ni lo.
Chhingcows lamin inkhel hmuhnawm lantir mah se West Warrior midfielder Jacob Lalrawngbawla freekick pet Lalnunmawia tauh goal tur erawh an dang thei lo a, darkar chanve a ral chuan 1-1 a ni.
Amaherawhchu, team ṭha danglamna a lang zui a, minute 45-naah MS Dawngliana'n hmahruaina goal a khung - half time-ah 2-1 a ni.
Second half an ṭan chiah a, West Warrior defender Lalmawizuala'n an lama tihluh bawk avangin Chhinga Veng kalkawng a harsa lo. Chhingcows winger Laldampuia'n season liam taa a khelhna club lakah goal hnih - a luh dan inang zet mai - a khung belh a, minute 90 zawh chuan Chhinga Veng 5-1 in an chak.