A naute khelh danah Pep a lungawi

Manchester City manager Pep Guardiola chu Inrinni zana Tottenham 3-0 a an hneh ṭuma a naute khelh danah a lungawi hle a, season hmasa chhung zawnga an kelh dan aiin a ṭhat zawk thu a sawi.

Nashville, United States-a International Champions Cup inkhelah City hian John Stones, Raheem Sterling leh Brahim Diaz te goal hmangin season hmasa Premier League pahnihna Spurs an hneh. City hian an match hmasa lamah Real Madrid hnehin Manchester United an ngam lo thung.

City manager Guardiola chuan, "Pre season mai a la ni, mahse khatiang em em a ṭha khan season hmasa chhung zawng khan kan khel chhuak lo," tiin Spurs laka a naute chet danah a lungawi takzet tih a sawi.

Man City tan hian striker Gabriel Jesus-a'n goal ruakah a khung ṭhelh a, tawnhriat ngah zawk Sergio Aguero chuan goal post ṭum hnih a tih per bawk. Defender Kyle Walker-a'n a club hlui hmachhawn turin inkhel bul a ṭan a, England international hi goal venhim leh a nawr kawngah a thawhhlawk hle.

Spanish manager Pep hian inkhelh ṭan hmain tlarhnung thuam chak turin central defender an la melh thu a sawi a, inkhelh zawhah midfielder an ngah thu a sawi zui leh bawk avangin Premier League ṭan hmain a squad a la siksawi ngei dawn tih a chiang.

Barcelona manager hlui Guar­­diola chuan, "Tun din­hmun­­ah hian midfielder kan ngah, Sa­mir Nasri hian kan dinhmun a hre chiang a, a hma hun chu a agent nen an chinfel tur a ni ang," a ti. Arsenal madifelder hlui hi season hmasa khan loan hmangin La Liga lamah an chhuahtir tawh bawk.

Spurs an buai?

Stadium thar an sak mek avangin Tottenham hian an duh angin transfer bazarah sum hman tur an ngah tawk lo tih a hriat. Tun nipui chhungin an defender rinrawl ni ṭhin Walker an chan tawh a, a thlak tur leh an squad ti chak tur lakluh an la nei lo thung.

Tottenham hian pre season an hmang ṭha lo hle. United States-a an zin chhuahna lamah hian Paris St-Germain hneh mah se AS Roma an ngam lo a, tunah en elpui City lakah chiang zetin an tlawm zui. Premier League lama an elpui Chelsea manager Antonio Conte leh Manchester United boss Jose Mourinho te chuan Spurs hi an kap zauh tawh.

Spurs Mauricio Pochettino chuan, "Sum an hmang hnem em em a, khelmual chhunga kan danglamna erawh tlemte chauh a ni. Anni elphak tur hian kan thawkrim dawn a, bench lamah player naupang duhawm tak tak kan neih bakah kan squad mi ti chak thei tur kan melh reng bawk," tiin a sawi.

Tottenham-in league nomawi an chawi hnuhnun ber chu kum 1961 daih tawh kha a ni a, tuna hnaia nomawi an chawi hnuhnung ber pawh League Cup (2008) kha a ni. An elpui club dangte anga sum an hman hnem loh avangin Argentine manager Poch kaihhruaina hnuaiah sea­son thar hian fiahna hautak an hmachhawn ang.