PSG tan Alves a vul nghal

Dani Alves chuan a club thar Paris St Germain tan competitive match a khelh hmasak berah goal a khung nghal. Inrinni zan khan PSG hian an elpui AS Monaco chu 2-1 a hnehin Trophee des Champions nomawi an chawi.

French Ligue 1 cham­pion leh French Cup champion tena an inchuh ṭhin Trophy of Champions hi PSG-in vawi nga an lakna chiah a ni a, season hmasa league lama an tluk loh an hneh avangin an lawmna a zual ang.

Ligue 1 champion Mo­naco tan defender Djibril Sidibe chuan mawi zeta keeper Alphonse Areola chip khumin a team hma a hruai pui. PSG tan Alves-a'n yard 35-a hla aṭangin freekick chhuih lutin an si phurh a sut a, kum 34 mi Alves hian Adrien Rabiot goal khung tur a siamsak leh bawk.

Barcelona leh Juven­tus defender hlui hian Turin club tana a contract a hman zawh hnuah Manchester City zawm tura ngaih a ni. Mahse, hlawh pe huai zawk PSG tan season hnih daih contract a ziak ta zawk, kar khatah £230,000 zet a la hlawh.

Coach Unai Emery kaih­hruaina hnuaia par­vul nghal Alves chuan, "Duhthusam nei ta ila, hetiang baka club thar tana bulṭanna ṭha leh thlanawm hi a awm thei chuang lo ang. Pre season tour lamah kan result a ṭha tawk lo a, inelna pawi­mawhah erawh club ṭha zia kan chuah theih avangin a lawmawm hle," tiin a sawi.