Aizawl Open-ah Manajit a champion
Inrinni khan Kulikawn Indoor Stadium-ah Aizawl Open 2017 leh MBA Senior Ranking Tournament chu khelh zawh a ni a, mipa singles-ah Mizoram number 1 Manajit Singh a champion. He tournament-ah hian Mizoram chhunga club hrang hrang 30 aṭangin shuttler 147 an tel a, match 129 khelh a ni.
Inelna hi District Badminton Association Aizawl Central buatsaih niin category hrang hrang pakua - mens singles, mens doubles, womens singles, womens doubles leh mixed doubles te chu MBA Ranking niin ranking player-te an tel ṭha hle. Heng baka category dang pali erawh ranking inelna a ni lo thung.
Mizoram Badminton Association hian Kulikawn Indoor leh Ramhlun Indoor-ah te Catch Them Young programme a kalpui mek a, a hlawkna pawh hmuh chhoh zel a ni. Tournament chhung hian Court Official Committee buatsaihin State Umpire Exam neih nghal a ni a, theory leh practical hmanga exam neih a nih hnuah mi pakua ten State Umpire Grade II an pass thar.
MBA hian August 1-5 chhung hian Mission Veng Indoor Stadium-ah MBA Junior Ranking Tournament an buatsaih leh nghal dawn a, September thla hian North East Inter-State Badminton Team Championship an thleng bawk ang.