Real Madrid ngam loh Barcelona

Spanish club lian pahnih Real Madrid leh Barcelona an inhmachhawn tawh chuan friendly match pawh nise a boruak a nep thei lo - Nimin khan Real leh Barca hi pre-season tournament International Champions Cup-ah an intawng a, chungnung zawk chu Bar­celona an ni.

Hard Rock Stadium, Miami khawpuia mipui 66,014 pungkhawm hmaah Barcelona tan Lionel Messi, Ivan Rakitic leh Gerard Pique-ten goal khat ṭheuh an khung a, Real-in Mateo Kovacic leh Marco Asensio hmanga khung vein Catalan club hi 3-2 in an chak.

Neymar = not out?

Barcelona tan khawvelin MSN tia a hriat lar Messi, Luis Suarez leh Neymar-te an inlan vek. Brazil captain Neymar hi tun hnaiah Paris Saint Germain nen sawizawm mek an ni a, hetiang boruak karah hian Miami khawpuia an training-naah Barca player thar Nelson Semedo nen an inbakkaih bawk.

Neymar-a chanchinin foot­ball ngainatute beng a verh a, media-te chaw tui ber a ni. Miami khawpuiah hian inlan lo leh ngat se chu France khawpui Paris lam panin a puanthuah a tel ngei dawna ngaihna a lian sawt ang. Mahse, coach Ernesto Valverde-a'n a player hi chhuahtir a tum lo tih nemngheh nan inkhel bul a ṭantir a, MSN an la khel ho zel.

Messi = goal

Khelmuala Lionel Messi inlan thu sawi a nih chuan 'goal' tih hian a zui ngei ṭhin. Miami khawpuiah pawh a danglam chuang lo. Argentina captain hian inkhel ṭan aṭanga minute thumna lekah goal hmahruai a khung nghal a, Real tlarhnung an hawihai. Catalan club an tui laklawh a, goal hmahruai an khung aṭanga minute li hnu lawkah an goal hnihna an khung lehnghal - a khungtu chu Rakitic a ni.

Barcelona hi tun hnaiah Liverpool player pawimawh Philippe Coutinho nen sawi­zawm mek an ni a, pound maktaduai 72-a Reds an dawrna hnawl a nih hnuah Merseyside club hnenah pawisa bakah Rakitic pek belh an inhuam nia tarlan a ni. Miami khawpuia a inkhelh dan enin Croatian midfielder hi player dang man 'mai mai' a beh tel tir chi niin a lang lo a, MSN khelh dan enin Neymar chu chhuahtir atana a uiawm zia a lang nawn bawk.

No Ronaldo, no problem

Barcelona-in an thiam­puipa Lionel Messi an thawh­chhuahpui laiin Real Madrid erawhin 'Lal Fapa' ang maia an chei bawl Cristiano Ronaldo chu chawlh an la pek avangin an chhawr thei lo. Inkhel ṭantir lamah Ronaldo tel lohna Madrid an talbuai niin lang mah se ngai an awh chho a, Gareth Bale leh Luka Modric-ten Real game an thunun ṭan.

Goal an chhuah aṭanga minute ruknaah Real-in an si phurh an sut ṭhen a, chhuak tur anga sawi thawm awm mek Mateo Kovacic chuan Real player nih a phu tih pholangin goal hi a khung. Madrid khaw club an phur chhunzawm a, inkhel ṭantir lama inkhel thununtu Barca an buai - minute 36-naah Marco Asensio chuan si phurh sutna goal a khung. Spanish rawlthar duhawm hi season tharah a hmel kan hmu tam sawt a nih pawhin a mak lo ang.

Barca tan Pique

Chawlhlawk hman a niha team pahnih dinhmun chu 2-2 a ni a, chak tur zawk rinthiam a har hle. Club pahnihin 4-3-3 formation an hman avangin goal khung an tum tih a chiang a, first half-ah chungnung zawk tia sawi tur an awm lo. Mahse, second half ṭan a nih hnuah Gerard Pique a inlar a, Spanish defender hian minute 50-naah an goal thumna a khung.

Pique goal thumna hi Neymar ke aṭanga chhuak a ni a, mual veilam sir aṭanga Brazil captain free kick chu a volley goal. Real-in a chhanletna an nei thei lo a, an mualpho leh ta.

Real Mualphona

Zinedine Zidane-a nauten Champions League leh La Liga nomawi chawi chungin season an khar a, media-ten an fak rawn. Mahse, season a tawp a, pre-season match an khelh meuh chuan Real hi hmanni lawka Europe awptu kha an ni ta lo em ni chu aw, tih tur a ni.

Spanish club hian Interna­tional Champions Cup-ah hian an match hmasa berah Manchester United chu penalty hmangin an ngam lo tawh a, Manchester City-in 4-1 in an sawp tawh bawk. An hmelma kumhlun Barcelona hmaah pawh Real dinhmun a danglam lo a, match thum an khelha an vawi thum tlawmna ni turin an chawk lo leh ta. Real-in Ronaldo an la mamawh reng tih a lang a, an squad thuam chak turin ngaihtuahna sen a ṭul bawk ang.

Zidane a buai lo

Real Madrid boss Zidane chuan, "Tun hi pre-season a ni tihah kan chiang tur a ni. Kan result neih hi kan beisei ang a ni lo tih chu a chiang reng a, mahse hei hi kan nihna pholangtu a ni lo. Tuna kan tih tur chu August 8-a UEFA Super Cup kan khelh tur atana in peih hi a ni. Hmasawn kan ngai a, inthlak danglamna tur pawh tlem azawng chu a awm," a ti.

Barca coach Ernesto Val­verde chuan, "Real nena inkhel kan nih chuan engmah hi a 'friendly' tak tak thei lo. Ka team te khan inkhel bul an ṭan ṭha takzet a, inkhel an thunun chhunzawm danah pawh ka lawm hle. Goal dang khung theihna chance vawi tam kan nei a, ka naute thiam zia, a bik takin Messi ropuizia kan hmu leh a ni," a ti a, Neymar chu an hnena cham zel tura an duh thu a sawi bawk.