Delhi Dynamos-ah Brazilian midfielder
Indian Super League club Delhi Dynamos chuan tun season atana an foreign player lakluh hmasak ber ni turin Brazilian defensive midfielder Paulinho Dias an lakluh thu an puang. Kum 29-a upa midfielder hi Brazilian club ṭha Cruzerio Academy aṭanga inzirchhuak a ni a, an ram club Ipatinga, Marilia, Joinville, Guaratingueta leh Veranopolis-ah te a khel tawh bawk.
Paulinho hian nikuma thlawhtheihna chesual vanga khawvel hriat hlawh Brazilian club Chapecoense tan pawh a lo khel tawh a, kum 2012 nipui lai khan zawmin division hnihah lai a inhlankaipui hman a ni. Chape-a kum hnih chhung hun duhawm tak a hman hnuah kum 2014 khan Brazil Serie A club Atletico Paranaense chuan an lei chhuak a, hetihlaia Paranaense coach chu tuna Dynamos coach Miguel Angel Portugal hi a ni.
Delhi Dynamos Director Rohan Sharma chuan, "Paulinho kan lalut thei hi ka lawm takzet a ni. Portugal hian Dynamos a enkawl tur thu tihchian a nih hnua rampawn player a duh thu a sawi hmasak ber chu Paulinho hi a ni a, Atletico Paranaense player ISL-a lo hlawhtling tawh ṭhinte ang thoin a hlawhtlin theih beisei a ni," tiin a sawi.