Ferrari-ah Leclerc a nghet

Formula 1 driver beiseiawm berte zinga mi Charles Leclerc chuan Ferrari tana a rinawmna lantir nan kum nga daih contract a ziak thar a, kum 2024 thleng chu Italian team tan hian car a khalh zui dawn tihna a ni. Kum 22 mi, Monaco tlangval Leclerc hian season liam ta khan a zawnin Belgium leh Italy-ah hnehna a chang thei a, qualifying lama a chet ṭhat ṭhin bawk avangin a hmasa ber (pole position) chang hnem ber (7) a ni hial bawk.

Leclerc hian a teammate Sebastian Vettel chu kawng engkimah a khum rih a ni ber a, world champion vawi li ni tawh hi tawnhriat nei ṭha leh theihna nei sang zawka ngaih ni mah se Vettel aiin Leclerc hian a nep bik chuang lo tih a lantir chiang hle. Ferrari team principal Mattia Binotto chuan, "Season nga chhung atan inremna kan nei thei hi a lawmawm takzet a ni. Driver hmabak nei eng tak a ni a, a hmaa chona awm hlenchhuah zel duh mi a ni bawk," a ti. Leclerc chuan Ferrari car nen hlawhtlinna sang zawk chan theih a beisei thu a sawi ve bawk.