Premier League-ah Reina kir hnai

Liverpool goalkeeper hlui Pepe Reina chuan Premier League club Aston Villa zawm turin nimin khan medical a nei a, he thuziak i chhiar meuh chuan a zawm tawh hial mai thei. 

Premier League club Villa hian an goalkeeper Tom Heaton chu season tawp thleng inhliam vangin an chhawr thei dawn lo a, Villa manager Dean Smith chuan AC Milan aṭangin Reina hi season tawp thleng atan loan-in a lalut dawn. 

Spain tana vawi 36 inlan thei Reina hian 2005-14 chhung kha Liverpool tan a khelh avangin Premier League-ah a mikhual lo a, Premier League Golden Glove vawi thum zet lo dawng tawhin Barcelona, Villarreal, Napoli leh Bayern Munich tan a lo khel tawh bawk. 

AC Milan pawhin kum 37 mi Reina thlakna tur an zawng ve nghal a, Bournemouth keeper Asmir Begovic chuan Pathianni zan khan Italian club zawm tur hian Milan khawpui a thleng.