Indian club tan hmeichhe team

All India Football Federation (AIFF) general secretary Kushal Das chuan licensing criteria-ah hmeichhe team neih a tel tawh thu a sawi a, an hnuaia club-te chu hei hi zawm turin a sawm.

Hetihrual hian hmeichhe team hi neih ngei ngei tur tihna erawh a ni lo a, Indian Club licensing system hnuaia A emaw B level-ah dah a ni rih lo. Kushal Das chuan, "Kan licensing criteria-ah hmeichhe team neih tel a ṭha kan tih thu kan pholang a, neih ngei tur tihna erawh a ni lo. A bul ṭanna chauh a la ni a, muangchanga youth development program kan kalpuia kan hlawhtlinpui ang hian kan tih theih kan beisei a ni," a ti.

Indian Club licensing system hnuaiah hian sporting, infrastructure, personnel & administrative, legal leh financial chu teh nan hman a ni a, heng point panga hnuaiah hian A, B & C-ah criteria hrang hrang ṭhen leh a ni.

Hetihrual hian license hmu tura neih ngei ngei ngai erawh Grade A chauh a ni a, a hnuai lam zawngah erawh pawisa chawi theihna leh thil thleng thuta license tihtawp sak theihna te a ni thung. India ramah hmeichhe football-in hmalam a pan ve zel a, nakkumah hmeichhe FIFA Under 17 World Cup leh kum 2022-ah hmeichhe AFC Asian Cup thleng turin AIFF a inbuatsaih mek a ni. Season hmasa Indian Women’s League-ah khan team 12-in final round an khel a, Salem Veng nula Grace Lalrampari khelhna Gokulam Kerala FC an champion.