Saliba tana fiahna tur Aleksandar Mitrovic

Premier League hmahruaitu Arsenal chuan zanin dar 10:00 hian Fulham an mikhual dawn. Emirates Stadium-ah Mikel Arteta nauten striker palian Aleksandar Mitrovic an hmachhawn tur hi William Saliba tan fiahna a ni ang.

Gabriel Jesus hming a ri ring a, tlarhma lama a tal nat em avangin a mak lo. Gunners inkhel chik taka en ṭhinte chuan tlarhnung lama Saliba leh a ṭhiante pawimawhna an hmuh hmaih lo ang, an chakna hnar pawimawh an ni ṭhin.

Saliba vs Mitrovic
Season ṭan niah Fulham hian Liverpool an hmachhawn a, kai thar hi chak lo tura ngaih an ni. Mahse, point an hlawh chhuak thei a, defender ṭha mi Virgil van Dijk chu Mitrovic lakah a mualpho - Serbian striker hi Dutch defender leh Trent Alexander-Arnold ten an veng hneh lo.

Feet ruk leh inches hniha sang striker hi ball kangah a hlauhawm a, tharum a ngah avangin lei lamah pawh a hlauhawm tho. Championship match 44 aṭanga goal 43 khung thei a ni ngawt lo, tun season EPL-ah pawh match thum aṭangin goal thum a khung der tawh.

Arsenal tlarhnung tan ani hi ven ngun ngai bik tur a ni a, a bik takin tlarhnung lailum luahtu Saliba hna a ni dawn. 6ft 4in a sang Saliba hian tun season aṭangin Gunners-ah hmun pawimawh a chang, a tan chuan zanin hi fiahna hautak a ni tura ngaih a ni.

France international hi defender ni mah se ball semtu pawimawh a ni tel a, Bournemouth an hneh ṭum khan ball pass vawi 75 neiin a pass dik vek. Crystal Palace, Leicester City leh Bournemouth an hmachhawn ai chuan zaninah hna a hautak zawkin a rinawm.

Jesus vs Adarabioyo
Fulham hian Arsenal hi an hneh ngai meuh lo, vawi 59 an inkhelh tawhah Gunners hi ṭum 40 ngawt an chak. An tan Emirates Stadium lenluh a chakawm hran lo ang, point hmuh an duh a nih chuan Jesus ven dan an hriat a ngai dawn.

Brazil international Jesus hian season bul a ṭan fuh, goal a khung bakah team tan a ṭangkai. Ani dang tur chuan Fulham defender Tosin Adarabioyo a pawimawh dawn. English defender hian tun season EPL an khelh tawh china minute zawng zawng a la khel vek.

Kum 24 mi Adarabioyo hi 6ft 5in zeta sang a ni a, West Brom leh Blackburn tana a khelh hnuin Fulham tan season hnih chhung ṭha takin a khel leh tawh - Arsenal hmatawng zingah feet ruk tling an awm lo, ball kang chu an tauh khalh hman a rinawm loh.

Gabriel Martinelli, Jesus leh Bukayo Saka te inkawpin Fulham goal an nawr leh dawn a, match thum aṭanga goal li chhuah an nih avangin Marco Silva-a'n season kal laia goal khung hnem ber Arsenal (9 goals) lakah tlarhnung a rem uluk a ngai ang.