New York pan thei lo Djokovic

Novak Djokovic chuan US Open a khel thei dawn lo, hripui leng laka invenna vaccine a lak duh loh avangin a tan United States pan theih a ni lo tih a chiang ta - Serbian star hi New York khawpuiah a hmel kan hmu ve thei dawn lo tihna a ni.

Djokovic hian vaccine lak loh vang bawk hian January thla khan Australian Open a khel thei lo. US sorkar pawhin 2021 October thla aṭang khan, an rama zin lut tur chuan vaccine an la ngei tur a ni tih dan a hmang a, tun thlengin he dan hi an la hmang.

Grand Slam vawi 21 champion tawh Djokovic chuan, "Vanduai thlak takin US Open khel turin New York ka pan thei dawn lo. Ka rilru lamah nghawng a nei rih hran lo a, ka tan hun ṭha a la inherchhuak ve leh turah ka ngai, kan inhmu leh thuai dawn nia," tiin a sawi.

Djokovic hi US Open khel tur hming ziah luh zingah chuan a tel hman. Training pawh ṭha takin a nei reng - July thla tawpah pawh khan US sorkar chuan an dan hman lai an tihdanglam a beisei thu a la sawi.

Mahse, a duh leh beisei angin US sorkarin kawng a hawnsak lem lo. Inkaihhruaina ṭhenkhat thlahdul ni mah se, ram dang mi zin lut tur leh vaccine lak chungchang hi chu a ngaiin an la kaltlangpui rih ta zawk a ni.

World number 1 hlui Djokovic inlan dawn lo mah se, major title lak hnem lama a elpui ber Rafael Nadal erawh a inlan dawn. Spanish star hian Novak aiin Grand Slam nomawi pakhatin a nei hnem zawk, an inkar tih zau theihna remchang a ni ang.

US Open 2022 hi August 29, Thawhṭanni aṭangin Flashing Meadows, New York-ah khelh ṭan tur a ni dawn. Tennis season kal laia Grand Slam hnuhnung ber a ni ang.