Liverpool bazar leh an tum?

Jurgen Klopp-a enkawl Liverpool-in beisei angin season bul an ṭan lo a, Fulham (2-2) leh Crystal Palace (1-1) nen an inhnehtawk hnuin Manchester United lakah 2-1 in an tlawm.

Liverpool-in player inhliam an nei nual bawk a, hei vang hian nipui transfer-a bazar zo tawh anga sawi Liverpool-in transfer bazar-ah an mit an len leh ṭan nia sawi a ni a, Frenkie de Jong hming a ri ring hle.

Mipui hriata transfer chungchang sawi khât tak Klopp hian media hmaah, "Manager ka nihna ang chuan player tam zawk chhawr theih neih ka duh. Mahse, chu chu ka sawi theih chhun a ni a, theihtawp kan chhuah reng.

"Thil tih theih kan ni em, tih erawh ka sawi thei lo," a ti a, midfield-ah ringawt pawh hliam vanga Thiago Alcantara, Naby Keita, Curtis Jones leh Alex Oxlade-Chamberlain te chhawr thei lotu Klopp hi pawisa pek ni se chuan bazar a duh tih a lang.

Reds hian Manchester United pan duh lo Frenkie de Jong chu pound maktaduai 60-a lakluh tumin Barcelona an dawr nia sawi a awm a, Jude Bellingham hming a ri bawk.

Mahse, Bellingham erawh Liverpool hian nakkum nipuiah lakluh an tum chauh nia sawi a ni a, The Times sports chief football writer Henry Winter chuan, "Nakkumah LFC-ah Bellingham hi hmuh ka beisei," tiin twitter-ah a ziak.

Liverpool hian zanin dar 7:30-ah league match an khel dawn a, Bournemouth an mikhual ang - champion an tum chuan tlawm a thiang tawh lo.