City khingpui tur fak hlawh lo Vieira naute

Manchester City-in zanin dar 7:30 hian Crystal Palace an mikhual dawn. Pep Guardiola hoten league match hnuhnung berah Newcastle United lakah point hnih an hloh a, 3-3 in an inhnehtawk.

Premier League champion khingpui tur hi Patrick Vieira enkawl Eagles an ni a, chetsual theihna an ni ang. A chhan chu Vieira hian team ṭha tak a din a, Arsenal legend hian a phu ang tawk fakna a dawn loh vangin Palace hi an langsar lo mai zawk a ni.

Palace hian match hmasa berah Arsenal hneh lo mah se Liverpool an chelh bakah Steven Gerrard enkawl Aston Villa 3-1 in an hneh. Wilfried Zaha hi Eagles tan chuan player ṭha chungchuang a ni a, midfielder Eberechi Eze leh forward Odsonne Édouard te hi an rintlak viau bawk.

Chutihrualin City erawh champion tura rinkai ber an ni a, amaherhawhcu nipui transfer-ah player lut leh chhuak an ngah deuh avangin insiamrem an la mamawh. Magpies an hmachhawn ṭumin City-in Allan Saint-Maximin an ngam lo a, Zaha lakah an chetsual nawn a thiang lo.

Tlarhma lamah Erling Haaland-a'n goal thum a khung chungin beisei a la pha lo a, nipui transfer zawh hma chuan Bernardo Silva pawhin 100% pek a harsat dawn niin a lang bawk.