Man United hmaah Real Sociedad

European football inelna sang pahnihna Europa League draw chu nimin tlai khan neih a ni a, Cristiano Ronaldo awmna Manchester United chu Group E-ah Real Sociedad, Sheriff leh Omonoia te nen an awmkhawm.

UCL goal 141 khung tawhtu Ronaldo hi a chhuak lo a nih chuan Europa League-ah kan hmu dawn, nipui bazar hun a la zawh loh avangin a hma hun erawh a la chiang lo thung.

Arsenal chu Group A-ah PSV Eindhoven, Bodo/Glimt leh Zurich te nen an awmkhawm.

Season hmasa khan Mikel Arteta naute hian Champions League an beisei sang hman hle, mahse season tawp lama an talbuai avangin Tottenham Hotspur an tluk lo. Kum 2015/16 season hnu lamah UCL an la khel leh lo a ni.

Serie A-ah parukna ni mah se AS Roma-in Europa Conference League nomawi an chawi a, manager ṭha Jose Mourinho enkawl team hi Group C-ah Ludogorets, Real Betis, HJK te nen an awmkhawm a, harsa vak loin group stage an paltlang thei ang.

Group stage match hmasa hi September 8 aṭanga khelh ṭan a ni dawn, ruahman dan chuan nakkum February 16&23 hian knockout round khelh a ni thung dawn a ni.

Europa League Draw
Group A: Arsenal, PSV Eindhoven, Bodo/Glimt, Zurich
Group B: Dynamo Kiev, Rennes, Fenerbahce, AEK Larnaca
Group C: AS Roma, Ludogorets, Real Betis, HJK
Group D: Braga, Malmo, Union Berlin, St Gilloise
Group E: Manchester United, Real Sociedad, Sheriff, Omonoia
Group F: Lazio, Feyenoord, Midtylland, Sturm Graz
Group G: Olympiacos, Qarabag, Freiburg, Nantes
Group H: Crvena zvezda, Monaco, Ferencvaros, Trabzonspor