Fofana-a'n Chelsea hmachhawn dawn lo

Leicester City centre back Wesley Fofana chu zanin dar 7:30-a Chelsea an hmachhawn hunah a inlan dawn lo a, a inhliam vang ni loin Chelsea rim lai player a nih vang a ni.

Southampton laka 2-1 a Foxes an tlawm ṭum pawhin Fofana hi a inlan tawh lo a, Leicester boss Brendan Rodgers chuan a player chu khelmual lut turin a rilru lamah a la inpeih tawk lo niin a lo sawi tawh.

Chelsea hian Fofana hi lakluh tumin an hel reng a, Thawhlehni khan a vawi thum nan Foxes hi an dawr - an dawrna zat hi pound maktaduai 60-70 inkar nia sawi a ni a, Leicester hian an hnar.

London club-in Foxes an dawrnaah hian a khelh ṭhat dan a zira pek belh theih dan a awm a, mahse, Foxes chuan Chelsea-in add-on clause hman theihnaa an thil tarlan ṭhenkhat chu awmze nei loah an ngai a ni.

Kum 21 mi Fofana hian 2020 khan £36.5mtd-in Leicester hi Saint-Étienne aṭangin a zawm a, inelna hrang hrangah match 52 khelhsak tawhin goal khat a khung.

Hetihlai hian Chelsea chuan Dynamo Moscow midfielder Arsen Zakharyan lalut turin Russian club hi inremna an neihpui hnaia sawi a ni a, kum 19 mi midfielder manah £12.7mtd an seng ang.

Player agent Pavel Andreev chuan, "Thudik a ni a, inremna a hnai tawh hle," tiin a sawi a, he thuziak i chhiar meuh chuan an inlalut fel tawh hial mai thei.