European football-a ṭha ber pu tu ; Player thiam ber Benzema, Coach ṭha ber King Carlo

Ningani zan khan UEFA Champions League draw neih rualin UEFA award semna neih a ni a, chawimawina ngaihhlut hlawh ber UEFA Men's Player of the Year dawngtu chu Real Madrid striker Karim Benzema a ni.

Hetihlai hian Real-a Benzema pu Carlo Ancelotti chu UEFA Men's Coach of the Year atan thlan a ni a, La Liga leh Champions League nomawi chawitu a nih avangin he award dawn hi a phu hle.

Women's Player of the Year atan Alexia Putellas chu thlan a ni a, Barcelona midfielder hian season hman zawh takah khan match 37-ah goal 28 a khung a, Catalan club chu league, Champions League leh Copa de la Reina-ah a champion pui bawk.

England hmeichhe team enkawltu Sarina Wiegman chu Women's Coach of the Year atan thlan a ni - Euro 2022-ah England hi a champion pui a, match 20 a kaihhruai tawhah vawi 18 hnehna chanpuiin, vawi hnih draw result a nei.

A hming Benzema
Kumina Ballon d'Or dawng tura beiseiawm ber thlang dawn ila, Benzema chu hming langsar ber zinga mi a ni - award dawng tura a dinhmun ti ṭha zual turin French striker hian UEFA Men's Player of the Year award a dawng.

Kum 34 mi striker hian season hman zawh takah khan Real tan match 46 khelin, goal 44 a khung a, assist vawi 15 a nei - Champions League leh La Liga nomawi an chawi theihna turin a thawhhlawk hle.

Benzema hian Champions League bikah match 12 khelin goal 15 a khung a, league-ah match 32 khelin goal 27 a khung bawk. Hei chauh a ni lo, Benzema hi France senior team-ah kohkir a ni a, UEFA Nations League-ah France chu a champion pui bawk.

Real Madrid striker chuan, "Ka hlim takzet - he award ka dawn vawi khatna a ni a, mahse, ka tan chuan ka team-te nena nomawi kan chawi chu thil hlu ber a ni," a ti.

Mi chunga leng
Benzema hian he award dawng tur hian Manchester City thiampuipa Kevin De Bruyne (122 points) leh Thibaut Courtois (118) te aiin point a hmu sang zawk - a point hmuh zat hi 523 a ni!

Real Madrid boss Ancelotti pawhin a striker hi fakin, "Karim hi striker ṭha tak a ni satliah lo a, footballer ṭha tak, a rilru puthmang ṭha takin a thlawp tlat a ni. Season hmasa nena khaikhin chuan hriatna tihzauh lamah hma a sawn.

"Game a hrethiam a, game thlirdan a thiam a, dressing room-ah leader ṭha tak niin, ka tan ṭhian ṭha tak a ni bawk. Karim kan nei thei hi kan vannei a, Karim inkhel lai a hmuh theih avangin football hi a vannei a ni," a ti!

2021/22 UEFA Champions League Player of the Season atana lo thlan tawh Benzema pawhin a pu hi fakin, "Ancelotti hi khawvela coach ṭha ber a ni - player tinah hian thutlukna dik a siam zel a ni ber. Inrintawkna min pe a, match tinah kan tih tur min hrilh zel a ni," a ti a, a pu a chhuang hle.

King Carlo
Ancelotti-a'n coach ṭha ber dinhmun luah turin Liverpool boss Jurgen Klopp leh Manchester City coach Pep Guardiola a khum a, point 526 zet a hmuh laiin Klopp-a'n point 210 hmuin, Pep-a'n point 108 a hmu thung.

King Carlo hian Champions League final-ah Klopp-a Liverpool hmachhawnin an hneh a, European Cup/Champions League-a vawi li champion thei hmasa ber coach a ni. Ancelotti chuan, "Player quality tak tak ka neih vang leh he infiamna ka tuichilh em avanga lawmman dawng thei ka ni.

"Season hman zawh takah khan senior player leh naupang zawk inkarah inpawhna a ṭha em em a, fan-te nen kan thawkho ṭha bawk a, chu chuan beisei phak bak ropuinaah min hlangkai a ni," a ti.

European football-a coach ṭha ber hi 2021/22 UEFA Champions League, Europa League leh Europa Conference League khel club coach-te leh European Sports Media (ESM)-in an thlanchhuah journalist-te thlan an ni a, coach pathum thlangin, pakhatna (5 points), pahnihna (3) leh pathumna (1) thlenga vote pein coach ṭha hi thlan a ni.

UEFA Awards
Men's Player of the Year Karim Benzema
Women's Player of the Year Alexia Putellas
Women's Coach of the Year Sarina Wiegman
President's Award Arrigo Sacchi