Pathianni zanah cricket inkhela en châkawm bik India Vs Pakistan

Asia Cup 2022 chu zanin aṭangin UAE-ah khel ṭan a ni dawn a, match hmasa berah Sri Lanka leh Afghanistan te zanin dar 7:30 hian an inkhel ang. Khawvel nghahhlelh erawh August 28, Pathianni zan dar 7:30-a India leh Pakistan inkhel tur a ni.

India leh Pakistan ramri buaina hi infiamna khawvelah pawh chhawm a ni zel a, cricket chauh ni loin infiamna dangah pawh ram pahnih an inkhelh dawn chuan boruak a ṭang bik. Ram pahnih hi an inhal em avangin ICC hnuaia inelna loah chuan an inhmachhawn thei tawh meuh lo.

Test series-a an intawn hnuhnun ber chu kum 2008 daih tawh kha a ni a, ODI-a an intawn hnuhnun ber pawh kum 2013 daih tawh kha a ni. T20-ah phei chuan kum 2012-13 a India-in ṭum khat a mikhual kha ram pahnihin series an khelh chhun a ni a, heng aṭanga thlir ringawt pawh hian boruak nun dan tur chu a hriatthiam theih.

Rilru tinatu World Cup
India-in 2021 T20 Cricket World Cup-ah beiseina sang tak an nei a, amaherawhchu an beiseina hi Pakistan lakah a thamral nghal. Virat Kohli kaihhruai India chu Bazar Azam kaihhruai Pakistan lakah wicket 10-in an chak lo a, champion rinkai Men in Blue hian group stage pawh an paltlang lo.

India bowler-ten Pakistan opener pahnih Mohammad Rizwan (79) leh Babar Azam (68) te an vawm hlum thei lo a, man of the match-ah wicket thum latu Shaheen Afridi chu thlan a ni.

Pakistan laka an mualpho avangin India ṭantute team chungah an thinur a, India bowler Mohammed Shami chu phatsantuah an chhuah hial. Men in Blue player dang tan pawh hun hrehawm tia sawi theih a ni. Tun ṭuma an inkhel tur hi rilru na thawi damna a ni thei a, rilru nat belhchhahna a ni thei bawk.

Babar Vs Kohli
T20 World Cup hnuah India-in captain thar an nei tawh a, Rohit Sharma hoin an khel dawn. Men in Blue tana chanchin duhawm lo erawh bowler ṭha mi Jasprit Bumrah a khel thei dawn lo a, Pakistan pawhin an chhuanvawr Shaheen Afridi an chhawr thei dawn bik lo.

India ṭantute mitu fukna tur chu Virat Kohli a la ni tho dawn a, Kohli hi Asia Cup-a a che ṭha lo a nih chuan kum tawpa neih tur T20 World Cup-ah ram tana khelh phak a harsat ang.

Pakistan lamah erawh captain Babar Azam a la che ṭha reng a, inkhela danglamna thlen thei tur player a ni. Chutihrualin India squad hi a chhah ṭha zawk a, Kohli che ṭha lo mah se Rohit Sharma, KL Rahul, Hardik Pandya leh Ravindra Jadeja te hi danglamna thlen thei vek an ni.

Ram pahnih hi T20 bikah ṭum ruk chauh an la inkhel a, India hi ṭum li chakin Pakistan hi vawi khat chauh an la chak a, ṭum khat an inhnehtawk. Shaheens chak chhun erawh T20 World Cup a nih miau avangin a langsar a, India tan Asia Cup-a chak hi a pawimawh dawn a ni.

Asia Cup Fixtures
Group A: India, Pakistan, Hong Kong
Group B: Afghanistan, Bangladesh, Sri Lanka
Group khat aṭangin team pahnihin Super 4 khel turin an tling ang.

August 27, Inrinni
Sri Lanka 7:30 PM Afghanistan
August 28, Pathianni
India 7:30 PM Pakistan
August 30, Thawhlehni
Bangladesh 7:30 PM Afghanistan
August 31, Nilaini
India 7:30 PM Hong Kong