Lewy leh Haaland ten an club hlui hmachhawn dawn
UEFA Champions League draw chu Ningani zan khan Istanbul, Turkey-ah neih a ni a, Europe inelna sang ber group stage a ngaihnawm dawn.
Nipui bazarah Robert Lewandowski-a'n Bayern Munich aṭangin Barcelona a pan a, Catalan club hi German club nen group C-ah an awm. He group-ah hian Inter Milan an awm bawk a, group of death tih theih an ni. Sum lama talbuai vanga 'risk' la huai Catalan club hmabak a harsa dawn a, Lewy vang chauh lo pawhin Barca leh Bayern inkhel tur hi a pawimawh ang.
Group G-ah Manchester City leh Borussia Dortmund te pawh kawp an ni a, chumi awmzia chu Erling Haaland-a'n a club hlui a hmachhawn nghal dawn. He group-ah hian Sevilla leh Copenhagen te an awm bawk a, Pep Guardiola hote tan knockout stage lut turin hna harsa a awmin a lang lo.
Champions League-a record nei ṭha Liverpool chu Ajax, Napoli leh Rangers te nen group khatah an awm. Club hming langsar tak vek an nih avangin group A hi a ngaihnawm viau thei a, kum 10 chuang hnua UCL khel tur Scottish club enkawltu hi Giovanni van Bronckhorst ni loin Steven Gerrard ni zawk se, ngaihven a hlawh lehzual ang.
Antonio Conte kaihhruai Tottenham an vannei a, seeded team zinga hmachhawn châkawm ber Eintracht Frankfurt nen an awm ho a, Sporting Lisbon leh Marseille an awm bawk. Champion lai Real Madrid pawh group F-ah RB Leipzig, Shakhtar leh Celtic te nen an awm a, hna harsa tur a awmin a lang lo.
Chelsea pawh an vannei, Serie A champion AC Milan nen group E-ah awm mah se team dang pahnih hi RB Salzburg leh Dinamo Zagreb te an ni a, an awmna group-ah an lungawi ang. PSG-ah a season hnih nan Lionel Messi, Neymar leh Kylian Mbappe te an inkawp dawn a, MNM hi season khatnaah an hlawhchham dawn. Ligue 1 aṭanga teh chuan season hnihnaah an danglam tawh ang, PSG hi group H-ah Juventus, Benfica leh Maccabi Haifa te nen an awm ho a ni.
UCL Group Stage
Group A: Ajax, Liverpool, Napoli, Rangers
Group B: Porto, Atlético, Leverkusen, Club Brugge
Group C: Bayern, Barcelona, Inter, Viktoria Plzeň
Group D: Frankfurt, Tottenham, Sporting CP, Marseille
Group E: AC Milan, Chelsea, Salzburg, Dinamo
Group F: Real Madrid, Leipzig, Shakhtar, Celtic
Group G: Man. City, Sevilla, Dortmund, Copenhagen
Group H: Paris, Juventus, Benfica, Maccabi Haifa