Sports Minister-in Project Javelin a hawng

Mizoram Athletics Association (MAA)-in Mizoram chhung hmun hrang hranga beihpui a thlakna tur Project Javelin chu Mizoram sports minister Robert Romawia Royte-in nimin khan Aizawl Synod Conference Centre-ah a hawng.

Project Javelin hmang hian thingtlang lama infiammi, talent nei ṭhate hai chhuah beihpui thlak a ni dawn a, MAA hruaitute chuan he project hnuaiah hian hmun kilkhawr tak tak aṭanga infiammi ṭha tak tak hmuh chhuah an beisei a ni.

Robert Romawia Royte chuan, "Olympics-a gold 30 zet awmna Athletics-ah hma kan sawn loh chuan Mizoram hi sports-ah kan sang thei tak tak dawn lo," tiin a sawi a, Athletics hruaitute pawh nasa taka ṭang turin a chah bawk.

Sports Minister chuan, "Athletics-ah nasa taka kan ṭan loh chuan North East Olympics lo awm turah pawh medal lakah kan hniam fal leh dawn. Football angah te ti ṭhain champion fo mah ila, inelna dangah kan hnufum," tiin Athletics-ah Mizoramin ṭan a mamawh thu a sawi a, bungraw mamawh te a awm a nih chuan sorkar pawh a tlanchhiat loh tur thu a sawi bawk.

Project Javelin hawnna hunah hian kum 1988 National School Games-a Javelin Gold lo la tawh Zodintluangi, Aizawl Saron Veng leh Mizoram athletics record hrang hrang siamtu Lalthangpuia Sailo, Farkawn te hnenah MAA chuan chawimawina an hlan a ni.