Casemiro-a'n number 18 a ha dawn

Manchester United-in Real Madrid aṭanga an lakluh Casemiro chu jersey number an pe tawh a, club legend Paul Scholes-a hak ṭhin number 18 a ha dawn. Erik Ten Hag-a hoten vawiin tlai dar 5:00 hian Southampton an tlawh dawn a, Brazilian midfielder Casemiro pawh hi inlan tura beisei a ni.

Casemiro hian Sao Paulo tana a khelh laiin no. 8 leh no. 28 te a ha tawh a, Real Madrid Castilla (reserve team) ah no. 18 hain Real senior team-ah no. 38 leh no. 16 te a ha leh. Brazlian midfielder hian FC Porto-a loan hmanga a khelh ṭumin no. 6 a ha a, Real tan season hnuhnung pasarihah no. 14 a ha.

Brazilian midfielder Casemiro chuan, "Player ngaihsan chu ṭhahnem tak ka nei a, ka position bikah chuan Zidane a ni thei ang. Chutihrualin Man United bikah chuan Paul Scholes a ni. Ani kha lian lo mah se metre 50-70 te a pet thei a, a huaisen em em bawk," tiin a sawi.

Casemiro vangin Man United inkhel en châktu an pung sawt ang a, chutihrualin Liverpool hneh zo hlim an nih avangin an phur vanglai tak a ni hrim hrim bawk. An khingpui tur Saints hi season ṭantirhah Totteham lakah 4-1 ngawtin tlawm mah se hemi hnu hian chak loh an nei leh tawh lo.

Southampton hi Leeds nen 1-1 in an inhnehtawk a, Leicester City 2-1 a an hneh leh bakah League Cup-ah Cambridge United chu 3-0 in an sawp a, match hnuhnung pahnihah forward Che Adams-a'n goal li a khung. Scottish forward Adams hi Man United tlarhnung tan ven uluk a ṭul ang.