La Liga: Pathianni zanah Barca leh Real inlan dawn

Spanish La Liga kartawp inkhelh hun a lo thleng ta - tun season La Liga hian ṭum dang zawng aiin ngaihven a hlawh zawk em ni chu aw, tih mai tur a ni a, a chhan langsar tak chu Barcelona an ni.

Catalan club-in leiba tam tak nei mah se, an club share ṭhenkhat hralh a, sum tuakin, khawvela footballer ṭha ber ber an seng lut a, heng avang hian ngaihven an hlawh lehzual phah hle.

Pathianni zanah Xavi-a naute hi an inlan dawn a, zan dar 11:00-ah Real Valladolid an mikhual ang. Pathianni zan dar 1:30-ah Real Madrid an inlan dawn bawk a, European champion hian Espanyol chu khualmualah an lenchilh ang.

Hetihlai hian Atletico Madrid erawh an la inlan dawn lo a, Diego Simeone enkawl team hian Thawhṭanni zan dar 1:30-ah Valencia chu khualmualah an lenchilh dawn a ni.

Kounde buaina
Barcelona-in nipui transfer-ah player lakluh nan euro maktaduai 150 chuang an seng tawh a, mahse, tun thleng hian Sevilla aṭanga an lakluh Jules Koundé chu an la ziak lut thei lo.

Catalan club tan Kounde ziak lut turin euro maktaduai 20 vel neih belh a ngai a, he thu buatsaih thlenga player hralh emaw share hralhna aṭanga an sum hmuh sawi tur a awm lo chungin Diario AS journalist Manu Sainz chuan, Kounde hi an ziak lut thei tawh dawn niin a sawi.

Barca hian Samuel Umtiti chu loan-in Serie A club Lecce-ah an kaltir tawh a, chutihrual chuan chhuak tura an duh Martin Braithwaite leh Memphis Depay te chu he thu buatsaih a nih thleng hian an la hralh thei lo.

Hetiang boruak karah hian Kounde hian hrehawm a ti tawh hlea sawi a awm a, Barca hnenah pawh hrehawm a tih thu hi a hriattir tawh. Catalan club hian Kounde hi an la ziak lut thei lo cheu a nih chuan, September 1-a transfer bazar a tawp hmain a duh chuan free transfer-in a chhuak daih thei!

A har a ni
Barca-in Kounde an ziah luh theih loh chhan langsar tak chu an lakluh aia tam an hman vang a ni ber. French defender hian Barca-ah kum khatah €9.5mtd a hlawh dawn a, a man hi €50mtd niin, kum nga atan contract a ziak.

Kounde man hi La Liga chuan kum ngaah hian a ṭhen sawm leha a, French defender man atana kum khata Barca sen zat chu €10mtd tihna a ni. Barca-in Kounde enkawl turin kum khatah €20mtd vel an mamawh tihna a ni a, Kounde ziak lut turin heti zat sum an lakluh leh phawt a ngai.

Mahse, Barca-in Pierre-Emerick Aubameyang duhtu Chelsea nen inremna an la nei thei lo a, Depay lah Juve-ah an hralh mai dawna a lan laiin, Italian club hian Manchester United hnena Adrien Rabiot an hralh theih loh avangin sum an nei lo a, Marseille aṭangin Arkadiusz Milik chu loan-in an la leh ta zawk.

Barcelona hian Braithwaite chu chhuahtir duh mah se an la hralh thei lo bawk - Denmark international hi Real Mallorca chuan lakluh duhin an dawr a, Catalan club-a kum hnih contract la nei striker hian a chhuak dawn a nih chuan euro maktaduai nga pe turin Barca hi a phut.

Buaina kara beiseina
Barca-in khelmual pawnah buaina chinfel tur tam tak an la nei a, khelmual chhungah erawh an insiamṭha mek - Catalan club hian an match hmasa berah Rayo Vallecano chu 0-0 in inhnehtawkpui mah se match hnihnaah an insiamṭha a, team ṭha Real Sociedad chu 4-1 ngawtin an sawp.

Xavi-a tana hmuh nuam turin Robert Lewandowski chuan goal hnih a khung a, Ousmane Dembele leh Ansu Fati ten goal khat ve ve an khung bawk a, Ferran Torres leh Raphinha te an la awm bawk avangin Barca-in goal khung tur chu an nei ṭha tawk.

Real Valladolid tan Nou Camp-a Barcelona nawr nghal ngawt chu chetsual theihna a ni ang, tih a hriat a, he team hian fim taka an khelh a ṭul dawn - match hmasa berah Valladolid hian Villarreal chu 3-0 in ngam lo mah se match hnihnaah Sevilla chu 1-1 in an inhnehtawkpui a, chetsual theihna an ni.

Valladolid hi Real Madrid legend, Brazilian striker ropui ṭhin Ronaldo-a ta an ni a, Ronaldo hian a team hi Barca laka chak turin a duh khawp ang - mahse, season hmasaa an club top scorer Shon Weissman chu hliam vangin an la chhawr thei lo a, Gonzalo Plata dinhmun a la hriat loh bawk.

Real an hlim
Champion lai Real Madrid-in an midfielder ṭha mi Casemiro chân mah se an 'puja' a la kal fuhtluang rih a, Pathianni zan dar 1:30-a Espanyol an lenchilh hunah pawh harsatna nei loa hnehna chang tura beisei an ni.

Real Madrid coach Carlo Ancelotti leh striker Karim Benzema te chu UEFA Award-a coach ṭha ber leh player ṭha bera thlan hlim an ni a, award dawn hnua an match hmasa bera tlawm chu mualphona a tling thei ang.

Hetihlai hian damlohna avanga Celta Vigo hmachhawn thei lo Toni Kroos-a'n training a zawm leh tawh a, an league match hmasa pahniha hliam vanga inlan thei lo Rodrygo Goes pawhin training a zawm tawh.

A tawi zawnga sawi chuan Real hian an ṭhat theih dan berin Espanyol an lenchilh thei dawn a, Catalan club tan mikhual an châkawm lo - Real hian UEFA Super Cup-a champion nomawi an chawi hnuah Almeria (2-1) leh Celta Vigo (4-1) chu league-ah an hneh leh tawh a, Espanyol lakah zahngaihna lantir bik an tum lo ang.