Bayern el tawk an awm dawn em?

Bundesliga-ah Bayern Munich an kal fawr a, German champion hi match thum khelhah an la chak vek. Zanin dar 10:00-ah Bavarians hian fiahna an hmachhawn dawn a, an khingpui tur chu match thum khelhah tlawm la nei lo Borussia Monchengladbach an ni ang.

Julian Nagelsmann hote hian German Super Cup chhiar telin match liah goal 20 nan khung der tawh a, Robert Lewandowski an ngai lo - Liverpool aṭanga an lakluh Sadio Mane a ṭangkai nghal. Mane hian match liah goal li a khung a, player thar dang Matthijs de Ligt pawh defender ni mah se goal a khung tawh.

Bayern buaina chu tlarhnung a ni ṭhin a, tun season-ah centre back De Ligt leh right back Noussair Mazraoui te an lalut. Player thar awm hnuah nikum lama beisei pha lo Dayot Upamecano a che ṭha sawt a, team chhungah inelna ṭha a awm tih langin Benjamin Pavard pawh a rintlak hle.

Bavarians hi kil tinah an che ṭha a, Jamal Musiala lam hmaih a thiang lo. Kum 19 mi Musiala hian hliam tenau vangin Bochum a hmachhawn thei lo a, match hmasa pahniha goal thum khungtu hi Gladbach lakah a rawn kir dawn.

Gladbach hi Norwich manager hlui Daniel Farke enkawl a ni a, German manager hi Premier League-ah hlawhtling tawk lo mah se Championship-ah erawh a che ṭha hle. Bundesliga-ah Farke fiahin a awm dawn a, Allianz Arena-a point an hlawh chhuak a nih chuan result ṭha bik a ni thei ang a, Bayern-in elpui tham an nei tihna a ni thei bawk ang.