F1-ah Audi an tel dawn

German car siamtu lian leh changtlung Audi chu Formula 1 huangah an inlan dawn, kum 2026 aṭangin an tel ṭan ang. Audi chairman Markus Duesmann chuan FA atan German car company hi an inziah luh thu a sawi.

Audi hian anmahni in team an nei dawn nge, engine petu mai an ni dawn tih erawh an la sawi chiang lo thung. F1 huangah an tel dawn tih erawh a chiang tawh a, hei hian car intlansiakna sang boruak pawh a siam viauin a rinawm.

Duesmann chuan, "Intlansiak hi Audi thisenah a bet tlat a, kan nihna pawh a ni. Intlansiakna lian lo zawkah te chuan kan lo inrawlh tawh a, tunah chuan kan hlawhtlinna leh hming chherna hi F1 lamah kan ti zau ang," tiin a sawi.

F1 president pawhin inrmena an neih vanga a lawm thu a sawi. Stefano Domenicali chuan, "Audi nena kan inremna hian khawvel huapin F1 a chawi lar zual ngei ang, infiamna mai bakah pawn lam sumdawnna thlengin rah ṭha a chhuah ka beisei," tiin a sawi ve bawk.